ސީރިޔާގެ ރައީސް ބައްޝާރުލް އަސަދަށް ޤައުމު ދޫކޮށް ދާން ޖެހުނު ކަމާމެދު ކުރީގެ ރައީސް މައުމޫން އަބްދުލްގައްޔޫމް ހިތާމަފުޅު ފާޅުކުރައްވާއިފިއެވެ. އެކްސްގައި ކުރެއްވި ޓްވީޓެއްގައި މައުމޫން ވިދާޅުވެފައިވަނީ އެކުވެރި ސީރިޔާގެ ރައްޔިތުންނަށް ސުލްހަމަސަލަސްކަމާއި އުފާފާގަތިކަން އެދިވަޑައިގަންނަވާ ކަމަށެވެ.
ރަޙްމަތްތެރި ސީރިޔާގެ ރައީސް ބައްޝާރުލް އަސަދު ޤައުމު ދޫކުރައްވައި ވަޑައިގަތުމަށް ޖެހިވަޑައިގަތް ކަމަށްޓަކައި ހިތާމަކުރަން. އަޅުގަނޑު އެދެނީ އެކުވެރި ސީރިޔާގެ އުޚުއްވަތްތެރި ރައްޔިތުންނަށް ސުލްޙަމަސަލަސްކަމާއި އުފާފާގަތިކަން.
މައުމޫން ވިދާޅުވިއެވެ.
މައުމޫންގެ ވެރިކަމުގައި އަރަބި ލީޑަރުންނާއެކު ބާއްވަވާފައިވާ ގާތް ގުޅުންތަކުގެ ތެރެއިން ގިނަ ލީޑަރުންގެ ވެރިކަން މިހާރު ވަނީ "ރަބީއުގެ އިންގިލާބު"ގެ ސަބަބުން ނިމުމަކަށް އައިސްފައެވެ. އޭގެ ތެރޭގައި މިސްރުގެ ރައީސް ހުސްނީ މުބާރަކް އަދި ލީބިއާގެ ވެރިކަން ކުރެއްވި މުއަމަރުލް ގައްޒާފީފަދަ މައުމޫންގެ ވަރަށް ގާތް އެކުވެރިން ހިމެނެއެވެ.
ސީރިޔާގައި 2011 ވަނަ އަހަރު ފެށުނު ހަނގުރާމައިގެ ފަހުން، މިއަދު ވަނީ ހަޔާތު ތަހުރީރު އަލް ޝާމް (އެޗްޓީއެސް)ގެ އިސްވެރިޔާ އަބޫ މުހައްމަދު އަލް ޖުލާނީގެ ލީޑަރޝިޕްގެ ދަށުން ދިމިޝްކު ހިފައި، ވެރިކަން ވައްޓާލާފައެވެ.
މި ހަނގުރާމަ ފެށުނީ ރައީސް އަސަދުގެ އަނިޔާވެރި ވެރިކަމާ ދެކޮޅަށް ރައްޔިތުން ނުކުތުމުންނެވެ. ބެލެވޭ ގޮތުގައި މިހާރު ސީރިޔާގައި އުފެދޭ އައު ވެރިކަމުގެ އެންމެ އިސް ލީޑަރަކަށް ވާނީ އެޗްޓީއެސްގެ އިސްވެރިޔާ އަބޫ މުހައްމަދު އަލް ޖުލާނީއެވެ.
One Response
މަނިކުފާނަށް ފެނިވަޑައި ނުގަތަސް ތިހިސާބު ގަޑުގައި އާއިލީވެރިކަން ކުރާހުރިހާ އެންމން ގައުމު ދޫކޮއްފިލާ މަންޒަރު ފެންނަން ފަޝާފާނެ