ކުރީގެ ސަރުކާރުން އެކިއެކި އިންތިހާބުތަކާ ދިމާކޮށް 1،905 ކުށްވެރިންނަށް މާފު ދިން ކަމަށް ރައީސް ޑރ. މުހައްމަދު މުއިއްޒު މިއަދު ވިދާޅުވެއްޖެއެވެ.
އއ. ތޮއްޑުއަށް ވަޑައިގެން އެރަށު ރައްޔިތުންނާ ބައްދަލުކުރައްވާ ރައީސް ވިދާޅުވީ އެމަނިކުފާނުގެ ވެރިކަމުގައި ކްލެމެންސީ ބޯޑާއި އަދި ރައީސުލްޖުމްހޫރިއްޔާ އަށް ލިބިދީފައިވާ ބާރުގެ ތެރެއިން އަދަބު ލުއިކޮށްދީގެން ވެސް މާފުދީ މިނިވަންކޮށްފައިވާނީ 86 ކުށްވެރިން ކަމަށެވެ. އެކަމަކު، މިދިޔަ ސަރުކާރުގައި ކޮންމެ އިންތިހާބަކާ ދިމާކޮށް އެތައް ސަތޭކަ ކުށްވެރިންނެއް މިނިވަން ކުރި ކަމަށް ވިދާޅުވެ، އެކަންކަމުގެ ތަފްސީލް އެމަނިކުފާނު ވަނީ ދެއްވައިފައެވެ.
ރައީސް ޑރ. މުއިއްޒު ވިދާޅުވި ގޮތުގައި ކުރީ ސަރުކާރުން އިންތިހާބުތަކާ ދިމާކޮށް ކުށްވެރިންނަށް މާފު ދިނީ ގައުމާ މެދު ވިސްނުމެއް ނެތިއެވެ. މި ސަރުކާރުން އިންތިހާބުތަކާ ދިމާކޮށް ސިޔާސީ ވިސްނުމެއްގައި އެއްވެސް ބަޔަކު ޖަލުން ދޫކޮށްލާފައިނުވާނެ ކަމަށް އެމަނިކުފާނު ވިދާޅުވިއެވެ.
"އެކި އިންތިހަބުތަކާ ދިމާކޮށް ޖަލުތަކުގައި ތިބޭ ކުށްވެރިން އެއްވެސް ރީހެބިލިޓޭޝަނެއްގެ ތެރެއަށް ނުގޮސް މަގުމައްޗަށް ދޫކޮށްލިތަން ފެނުނު. އޭގެ ސަބަބުން ވަރަށް ގިނަ އެކި ކަހަލަ ނުރައްކާތެރި ކަންތައް އަނިޔާވެރި ކަންކަން މަގުމަތީ ހިނގާ، ހަމަނުޖެހުން އުފެދިފައިވޭ،" ރައީސް ވިދާޅުވިއެވެ.
ރައީސް ވިދާޅުވި ގޮތުގައި 2023 ވަނަ އަހަރުގެ ރިޔާސީ އިންތިހާބާ ދިމާކޮށް 429 ކުށްވެރިންނަށް މާފު ދިނެވެ. އަދި 2022 ވަނަ އަހަރު 256 ކުށްވެރިންނަށް މާފު ދިން ކަމަށް އެމަނިކުފާނު ވިދާޅުވިއެވެ. އޭގެ އެއް އަހަރު ކުރިން، 2021 ވަނަ އަހަރު ކައުންސިލް އިންތިހާބާ ދިމާކޮށް 458 ކުށްވެރިންނަށް މާފު ދިން އިރު، 2019 ވަނަ އަހަރު މަޖިލިސް އިންތިހާބާ ދިމާކޮށް 762 ކުށްވެރިންނަށް މާފު ދިން ކަމަށް ރައީސް ވިދާޅުވިއެވެ.
