ރާއްޖޭގައި ހެލިކޮޕްޓަރުގެ ހިދުމަތް ފެށުމުން އެއާޕޯޓު ނުހުންނަ ރަށްތަކަށް ވެސް ރޭގަނޑުގެ ވަގުތުތަކުގައި ދަތުރު ކުރުމުގެ މަގު ތަނަވަސްވެގެންދާނެކަމަށް ޓްރާންސްޕޯޓު މިނިސްޓަރު މުހައްމަދު އަމީން (ކެޕްޓަން އަމީން) ވިދާޅުވެއްޖެއެވެ.
ދައުލަތުގެ މީޑިއާ "ޕީއެސްއެމް" އިން ގެނެސްދިން، ސަރުކާރަށް އެއް އަހަރު ފުރުމާ ގުޅޭ ޕްރޮގްރާމެއްގައި މިނިސްޓަރު އަމީން ވިދާޅުވެފައިވަނީ އަންނަ އަހަރުގެ މާޗު މަހު މި ހިދުމަތް ފެށިގެންދާނެ ކަމަށެވެ. ބައިނަލްއަގުވާމީ ވައިގެ ދަތުރުފަތުރާ ބެހޭ ދުވަހާ ގުޅިގެން ދެއްވި ހިތާބުގައި އަމީން ވިދާޅުވެފައިވަނީ ރާއްޖޭގެ މަދަނީ އުދުހުމުގެ ސިނާއަތް ސިންދަފާތު ކުރުމުގެ ގޮތުން މި ހިދުމަތް އަލުން ތައާރަފުކުރުމަށް މަސައްކަތް ކުރަމުންދާ ކަމަށެވެ.
މި ހިދުމަތް ފެށުމާއެކު މެޑިކަލް އިވެކިއުއޭޝަންގެ އިތުރުން ރިސޯޓުތަކާއި އެއާޕޯޓާ ދެމެދު ފަތުރުވެރިން އުފުލުމުގެ ހިދުމަތްވެސް ލިބިގެންދާނެއެވެ. އަދި ސަލާމަތާއި ރައްކާތެރިކަމުގެ މިންގަނޑުތަކާ އެއްގޮތަށް މިފަދަ އުދުހުންތައް ފުޅާވުމުން އިގްތިސާދީ އަދި އިޖުތިމާއީ ގޮތުން ގިނަގުނަ ފައިދާތަކެއް ކުރާނެ ކަމަށް އަމީން ވިދާޅުވެފައިވެއެވެ.
މި ހިދުމަތް ދޭނެ ފަރާތެއް ހޯދުމަށް ޓްރާންސްޕޯޓު މިނިސްޓްރީން މިދިޔަ އޮގަސްޓު 6 ގައި އިއުލާންކުރި އިރު، 36 ބޭރު ކުންފުންޏަކުން ވަނީ ޝައުގުވެރިކަން ފާޅުކޮށްފައެވެ. ރާއްޖޭގައި މިހާރުވެސް ބަލިމީހުން އުފުލުމަށް އިންޑިއާއިން ހަދިޔާކުރި ދެ ހެލިކޮޕްޓަރު އެބަހުއްޓެވެ. ނަމަވެސް އެ ހެލިކޮޕްޓަރުތައް އޮޕަރޭޓުކުރުމަށް އިންޑިއާ ސިފައިން ތިބުމަކީ ބަލައިގަނެވޭނެ ކަމަކަށް ނުވާތީ، އެ މީހުން ވަނީ އަނބުރާ އިންޑިއާއަށް ފޮނުވާލާފައެވެ. އަދި މިހާރު އެ ހެލިކޮޕްޓަރުތައް އޮޕަރޭޓުކުރުމަށް އިންޑިއާގެ މަދަނީ ބަޔަކު ވަނީ ރާއްޖެ އައިސްފައެވެ.
