ފުލުހެއްގެ ގައިގައި ދަތް އެޅި އަންހެނަކު ހައްޔަރުކޮށްފިއެވެ.
ފުލުހުންގެ ދައުރު އަދާކުރުމަށް ހުރަސް އެޅުމާއި އާންމު އުނދަގުލުގެ އިތުރުން މާރާމާރީގެ ތުހުމަތުގައި ހައްޔަރުކުރީ އުމުރުން 44 އަހަރުގެ އަންހެނެކެވެ. އެމީހާގެ ބަންދާ މެދުގައި ގޮތެއް ނިންމުމަށް ކްރިމިނަލް ކޯޓަށް ހާޒިރު ކުރުމުން ބަންދަށް ވަނީ 15 ދުވަސް ޖަހައިފައެވެ.
ބަންދު އަމުރުގައިވާ ގޮތުން އެ މީހާއަކީ މަސްމާރުކޭޓު ކެފޭއަށް ވަދެ، އެ ތަނުގައި ތިބޭ މީހުންނަށް އުނދަގޫ ކުރާ މީހެކެވެ. އެހެންވެ، ފުލުހުން ގޮސް އެމީހާ ހުއްޓުވި ކަމަށް ބުނެފައިވެއެވެ.
ކޯޓުގައި ފުލުހުން ވަނީ ފުލުހުން ނަސޭހަތް ދޭން މަސައްކަތް ކުރުމުން ފިލަން މަސައްކަތް ކޮށް، ފުލުހެއްގެ ގައިގައި ޖަހައި އަދި ފުލުސް މީހާގެ ގައިގައި އަންހެން މީހާ ދަތް އަޅާފައިވާ ކަމަށެވެ.
ކޯޓުގައި އަންހެން މީހާ ބުނީ އޭނާއަކީ "ބޯ ސަކަރާތް" މީހެއް ކަމަށެވެ. ފުލުހެއްގެ ގައިގައި ޖެހުނު ކަމެއް އަދި ދަތް އެޅުނު ކަމެއް ހަނދާން ނެތް ކަމަށް އެމީހާ ބުނެފައިވެއެވެ.
