ރައީސް ޑރ. މުހައްމަދު މުއިއްޒު، ބައެއް ކެޔޮޅުންނާ މިއަދު ބައްދަލު ކުރައްވައިފިއެވެ.
ރައީސް އޮފީހުން ބުނީ މި ބައްދަލު ކުރެއްވުމުގައި މަސްވެރިކަމުގެ ސިނާއަތުގައި ރަނގަޅު ކުރުމަށް ބޭނުންވާ ކަންކަން ކެޔޮޅުން، ރައީސް ޑރ. މުއިއްޒުއާ ހިއްސާ ކުރެއްވި ކަމަށެވެ. އަދި މަސްވެރިކަމުގެ ސިނާއަތުގައި މިހާރު ހުރި ކަންބޮޑުވުންތަކުގެ މައްޗަށް އަލިއަޅުވާލައި ވާހަކަ ދައްކާފައިވާ ކަމަށެވެ.
ހަމައެއާއެކު، މަހުގެ އަގު ދަށްކަމާއި، ފައިސާއާއި ތެޔޮ ލިބުމުގައި ހުރި ދަތިތަކާއި، މަސްކިރުމުގައި ހުރި ގޮންޖެހުންތައްވެސް، ކެޔޮޅުން ރައީސް އާ ހިއްސާ ކުރި ކަމަށް ރައީސް އޮފީހުން ބުންޏެވެ. އަދި ރައީސްގެ ވައުދުފުޅާ އެއްގޮތަށް މަސްވެރިކަމުގެ ސިނާއަތް ކުރިއެރުވުމަށް ކުރާ މަސައްކަތްތައް ކުރިއަށްގެންދިއުމަށް ކެޔޮޅުން އެދުނު ކަމަށް ރައީސް އޮފީހުން ބުނެފައިވެއެވެ.
ކެޔޮޅުން ވަނީ ޓެކްނޮލޮޖީގެ އެހީގައި މަސްވެރިކަމުގެ ސިނާއަތް ޒަމާނީ ފެންވަރުގައި ކުރިއެރުވުމަށް ކުރެވިދާނެ ކަންކަން ވެސް ރައީސްއާ ހިއްސާކޮށްފައެވެ. މަސްވެރިކަމުގެ މާކެޓް އިތުރުކޮށް، މަހުގެ ފެންވަރު ނުވަތަ ކޮލިޓީ ރަނގަޅުކުރުމަށް ކުރެވިދާނެ ކަންކަމާ ގުޅޭގޮތުން ވެސް އެ ބައްދަލުކުރެއްވުމުގައި ކެޔޮޅުން މަޝްވަރާކުރިއެވެ. ސަރުކާރުން މަސްވެރިންނާއި ކެޔޮޅުންނާ ގާތުން، އެ މީހުންގެ ކަންބޮޑުވުންތަކަށް ހައްލު ލިބޭނެ ގޮތަށް މަސައްކަތް ކުރައްވާނެ ކަމަށް ރައީސް އެ ބައްދަލުވުމުގައި ވިދާޅުވި ކަމަށް ރައީސް އޮފީހުން ބުންޏެވެ.
އަދި މިއަދު ކުރިއަށް ދިޔަ ފަދަ ބައްދަލުވުންތައް ގިނަ ގިނައިން ބޭއްވެވުމަށް މަސައްކަތްޕުޅު ކުރައްވާނެ ކަމުގައި ވެސް އެމަނިކުފާނު ވިދާޅުވިއެވެ.
