އޮލިމްޕިކް ސައިޒު ސްވިމިން ޕޫލް އެޅުމުގެ އަމަލީ މަސައްކަތް މިހާރު ދާކަމަށާއި، މި މަސައްކަތް އަންނަ އަހަރުގެ ތެރޭގައި ނިންމާލެވޭނެ ކަމަށް އުންމީދުކުރައްވާކަމަށް ކުޅިވަރާއި ހަށިހެޔޮކަމާ ބެހޭ ވަޒީރު، އަބްދުﷲ ރާފިއު ވިދާޅުވެއްޖެއެވެ.
ސަރުކާރު އެމްވީއަށް މައުލޫމާތު ދެއްވަމުން ވަޒީރު ފާހަގަކުރެއްވި ގޮތުގައި، ކުރިން ހުއްޓިފައި އޮތް މި މަސައްކަތް އަލުން ފެށިގެން ދިޔުމަކީ ކުޅިވަރަށް މި ސަރުކާރުން ދެއްވާ އަހައްމިއްޔަތުކަން ދައްކުވައިދޭ ކަމެކެވެ. ބައިނަލްއަގުވާމީ ފެންވަރުގެ މުބާރާތްތައް ބޭއްވޭނެ ފެންވަރުގެ ސްވިމިން ޕޫލެއް އެޅުމަށް ކުރީގެ ދެ ސަރުކާރުން ވެސް މަސައްކަތްތަކެއް ކުރެއްވި ނަމަވެސް، އަމަލީ މަސައްކަތާ ހަމައަށް ވަޑައިނުގެން އެ މަސައްކަތްތައް މަޑުޖެހިފައިވަނިކޮށް، މިހާރުގެ ސަރުކާރުން ވަނީ އެންމެ އަހަރެއްގެ ތެރޭގައި ހުރިހާ ލިޔެކިޔުމެއްގެ މަސައްކަތް ނިންމައި، އަމަލީ މަސައްކަތް ވެސް ފައްޓަވާފައެވެ.
މި ސްވިމިން ކޮމްޕްލެކްސް ގާއިމުކުރުމަށް ހަމަޖެހިފައިވަނީ ކުރީގެ މާލޭ ކުނިގޮނޑު އޮތް ސަރަހައްދުގައެވެ. އެ މަޝްރޫޢުއަށް 50 މިލިއަން ރުފިޔާ ޚަރަދުވާނެ ކަމަށް ކުރީގެ ސަރުކާރުން ލަފާކުރައްވާފައިވާއިރު، އެ ބިން ވަނީ 50 އަހަރުގެ މުއްދަތަށް ސްވިމިން އެސޯސިއޭޝަނާ ހަވާލުކުރައްވާފައެވެ. މިހާރު އެ މަސައްކަތް ކުރިއަށްދަނީ ސްވިމިން އެސޯސިއޭޝަންގެ ބެލުމުގެ ދަށުންނެވެ.
