ހދ. އަތޮޅު ކައުންސިލްއިން ތަޖުރިބާއާއި ތަމްރީން ހޯދުމުގެ ނަމުގައި ތައިލެންޑްގެ ބެންކޮކަށް ކުރި 10 ދުވަހުގެ ދަތުރަށް މިލިއަނެއްހާ ރުފިޔާ ހޭދަކުރިކަން އޮޑިޓަރ ޖެނެރަލްގެ އޮފީހުން ނެރުނު އޮޑިޓް ރިޕޯޓުން ހާމަވެއްޖެއެވެ.
މިދިޔަ މަހުގެ 28 ވަނަ ދުވަހު ނެރުނު ހދ. އަތޮޅު ކައުންސިލްގެ އޮޑިޓް ރިޕޯޓުގައި ބަޔާންކޮށްފައިވާ ގޮތުގައި، މިދިޔަ އަހަރު ކުރި މި ދަތުރަށް 20 މީހުންގެ ހަރަދުތަކަށް ޖުމްލަ 952،885 ރުފިޔާ ހޭދަކޮށްފައިވެއެވެ. މިއީ ކައުންސިލަށް މިދިޔަ އަހަރު ލިބުނު އާމްދަނީއާއި ބްލޮކް ގްރާންޓުން ބޮޑު އަދަދެއް އެކުލެވޭ ހޭދައެކެވެ.
އޮޑިޓް ރިޕޯޓުގައި ފާހަގަކޮށްފައިވާ ގޮތުން، މި ދަތުރުން ހޯދިކަމަށް ބުނާ ތަޖުރިބާއާއި ތަމްރީނުގެ އަލީގައި އަހަރެއް ފާއިތުވެގެން ގޮސްފައިވާއިރުވެސް ހދ. އަތޮޅުގައި އެއްވެސް މަޝްރޫއެއް ފަށާފައެއް ނުވެއެވެ. މީގެ އިތުރުން، ކައުންސިލްގެ ބަޖެޓުގައި މި ދަތުރު ހިމަނާފައިނުވާއިރު، މިފަދަ ބޮޑު ހަރަދެއް ކުރުމަށް ފިނޭންސް މިނިސްޓްރީގެ ހުއްދަވެސް ހޯދާފައިނުވާކަން ފާހަގަކޮށްފައިވެއެވެ.
މި ހަރަދުތައް ކޮށްފައިވަނީ ދައުލަތުގެ މާލިއްޔަތު ގަވާއިދާ ހިލާފަށް ކަމަށްވާތީ، މިކަމަށް ޒިންމާވާ ފަރާތްތަކާމެދު ފިޔަވަޅު އެޅުމަށް އޮޑިޓް ރިޕޯޓުގައި ލަފާދީފައިވެއެވެ. އަދި ކުރިމަގުގައި މިފަދަ ދަތުރުތައް ކުރާނަމަ، ކައުންސިލްގެ ބަޖެޓުން ހަރަދުކުރުމުގެ ބަދަލުގައި ބޭރުގެ ފަރާތްތަކާ މަޝްވަރާކޮށްގެން ސްޕޮންސަރޝިޕް އަދި އެހީ ހޯދުމަށް މަސައްކަތްކުރުމަށްވެސް އޮޑިޓް ރިޕޯޓުގައި ބާރުއަޅާފައިވެއެވެ.
