ނެޝަނަލް ސޯޝަލް ޕްރޮޓެކްޝަން އެޖެންސީ (އެންސްޕާ)ގެ އޮފީސް ހިންގުމަށް އިމާރާތެއް ހޯދުމުގައި ކުރެވުނު މުއާމަލާތްތަކާ ގުޅޭ ތުހުމަތުގެ މައްސަލަ ރަޖިސްޓަރީކޮށް އެމައްސަލާއިގެ ތަހުގީގު އެންޓި ކޮރަޕްޝަން ކޮމިޝަން (އޭސީސީ)އިން ފަށައިފިއެވެ. އޭސީސީން ވަނީ ބައެއް މީޑިއާތަކަށް މިކަން ކަށަވަރުކޮށްދީފައެވެ.
ސޯޝަލް މީޑިއާގައި ކުރެވެމުންދާ ތުހުމަތުތަކުގައި ބުނެފައިވަނީ އެންސްޕާ ހިންގުމަށް އިމާރާތެއް ހޯދުމުގައި 34.8 މިލިއަން ރުފިޔާގެ މުއާމަލާތެއް އިމާރާތުގެ ވެރިފަރާތް ނޫން އެހެން ފަރާތަކާއެކު ކުރިކަމަށެވެ. މިގޮތުން ތުހުމަތު ކުރެވެނީ ފަހުން ފެށުނު އެމްއެމްޓީވީން ކުއްޔަށް ހިފާފައިވާ އިމާރާތެއް އެންސްޕާއަށް ކުއްޔަށް ދީފައިވާ ކަމަށެވެ.
މި ތުހުމަތުތަކަށް ރައްދު ދެމުން އެންސްޕާއިން ހުކުރު ދުވަހުގެ ރޭ ނެރުނު ބަޔާނުގައި ބުނެފައިވަނީ މި މުއާމަލާތަކީ މާލީ ވުޒާރާއާއި އެންސްޕާއާ ދެމެދު ގަވާއިދާ އެއްގޮތަށް ހިންގާފައިވާ މުއާމަލާތެއް ކަމަށާއި، މި ކަމުގައި އިތުރު އެހެން ފަރާތެއްގެ ބައިވެރިވުމެއް ނެތް ކަމަށެވެ.
އެންސްޕާއިން ވަނީ މި މުއާމަލާތްތަކާ ގުޅިގެން ކުރެވޭ ތުހުމަތުތައް ބަލައިދިނުމަށް އެދި އޭސީސީއަށް ސިޓީއެއް ފޮނުވާފައެވެ. ހީނާ ސޮއިކުރައްވައި އޭސީސީގެ ރައީސް އާދަމް ޝާމިލަށް ފޮނުވި މި ސިޓީގައި އެދިވަޑައިގެންފައިވަނީ މި ތުހުމަތުތައް ތަހުގީގުކޮށް، ވީ އެންމެ އަވަހަކަށް އެކަމާ ގުޅޭ ރިޕޯޓު ހިއްސާކޮށްދެއްވުމަށެވެ.
