"އެކްސް" ގައި ކުރި ޕޯސްޓަކާ ގުޅިގެން އިދިކޮޅު އެމްޑީޕީގެ އެކްޓިވިސްޓަކު ފުލުސް އޮފީހަށް ހާޒިރުވާން އަންގައިފިއެވެ.
ހުސައިން ޝާފިއު (ތުއްތު) ފުލުސް އޮފީހަށް ހާޒިރުވާން އެންގީ މާދަމާ މެންދުރު 1:30 އަށެވެ.
ފުލުހުން، ތުއްތުއަށް ފޮނުވި މެސެޖްގައި ބުނެފައިވާ ގޮތުން އޭނާ ހާޒިރުކުރަނީ މި މަހުގެ 8 ވަނަ ދުވަހު ކުރި ޕޯސްޓަކާ ގުޅިގެންނެވެ. ހަޑިހުތުރު ބަސް ބޭނުންކޮށް، ބިރުވެރިކަން އުފެދޭ ގޮތަށް ތުއްތު ކުރި ޕޯސްޓެއްގެ ގޮތުގައި ފުލުހުން ތުހުމަތު ކުރެއެވެ.
ތުއްތު ކުރި ޕޯސްޓުގައި ބުނެފައިވަނީ ސިނގިރޭޓު ފޮއްޓެއް ގަތީ 270ރ. އަށް ކަމަށެވެ. އެ ޕޯސްޓުގައި ރައީސް ޑރ. މުހައްމަދު މުއިއްޒަށް އަމާޒުކޮށް ހަޑިހުތުރު ބަސް ބޭނުންކޮށްފައިވެއެވެ. އަދި "މަށަށް ކަލޭ މަގެއް މަތިން ނުފެއްނާތި" ކަމަށް ބުނެ އިންޒާރު ދެއެވެ.
ތުއްތު ފުލުހުންގެ އިދާރާއަށް ހާޒިރު ކުރާތީ އެމްޑީޕީގެ އިސްވެރިން ވަނީ ކަންބޮޑުވުން ފާޅުކޮށްފައެވެ.
