މޯލްޑިވްސް ޓޫރިޒަމް އެވޯޑަށް ނަން ހުށަހެޅުމުގެ މުއްދަތު އަނެއްކާވެސް އިތުރުކޮށްފައިވާކަން ޓޫރިޒަމް މިނިސްޓްރީން މިއަދު ހާމަކޮށްފިއެވެ. މިއީ މި އެވޯޑަށް ނަން ހުށަހެޅުމުގެ މުއްދަތު އިތުރުކުރި ދެވަނަ ފަހަރެވެ.
އެންމެ ފުރަތަމަ މި މަހުގެ 14 ވަނަ ދުވަހަށް ކަނޑައަޅާފައިވާ ސުންގަޑި، ފަހުން އިތުރުކޮށް 28 ވަނަ ދުވަހަށް ބަދަލުކުރެވުނެވެ. އަދި މިހާރު އެ މުއްދަތު އިތުރުކޮށް، ޑިސެމްބަރު މަހުގެ 7 ވަނަ ދުވަހުގެ ރޭ 11:00 އަށް ބަދަލުކޮށްފައިވެއެވެ.
މި އެވޯޑުގައި ބައިވެރިވުމުގެ ފުރުޞަތު ހުޅުވާލާފައިވަނީ ރިސޯޓުތަކާއި، ހޮޓާތަކާއި، ގެސްޓުހައުސްތަކާއި، ސަފާރީތަކާއި، އަދި ޓްރެވެލް އެޖެންސީތަކަށެވެ. މި ފަސް ކެޓަގަރީން ޖުމްލަ 23 އެވޯޑެއް ދިނުމަށް މިނިސްޓްރީން ވަނީ ނިންމާފައެވެ.
އެވޯޑަށް އެދި ހުށަހަޅަންޖެހެނީ އޮންލައިންކޮށެވެ. އަދި އެވޯޑު ދިނުމުގައި ބަލާނީ 2023 ވަނަ އަހަރުގެ ޖޫން މަހުގެ 1 ވަނަ ދުވަހުން ފެށިގެން 2024 ވަނަ އަހަރުގެ މޭ މަހުގެ 31 ވަނަ ދުވަހުގެ ނިޔަލަށް ކޮށްފައިވާ މަސައްކަތްތަކަށެވެ.
މިދިޔަ އަހަރު ބޭއްވުނު އެވޯޑުގައި ފަސް ދާއިރާއަކުން 59 އެވޯޑަކަށް ހުޅުވާލެވުނެވެ. އޭގައި އެކި ކެޓަގަރީތަކުން 88 ފަރާތަކުން 225 އެޕްލިކޭޝަން ހުށަހެޅި، އޭގެ ތެރެއިން 31 ފަރާތަކަށް އެވޯޑު ލިބުނެވެ.
