ހދ. ހަނިމާދޫ އެއާޕޯޓުގައި ސީޕްލޭންގެ ޚިދުމަތް ފޯރުކޮށްދިނުމަށް މަސައްކަތްތަކެއް ކުރަމުން އަންނަ ކަމަށް އެމްއޭސީއެލްއިން މިއަދު ހާމަކޮށްފިއެވެ.
ރައްޔިތުންގެ މަޖިލީހުގެ ސްޓޭޓް އޯންޑް އެންޓަޕްރައިޒަސް ކޮމިޓީގެ ސަބް ކޮމިޓީގައި އެމްއޭސީއެލްގެ ޑެޕިއުޓީ މެނޭޖިންގ ޑިރެކްޓަރ މުޖުތަބާ ލަތީފް ވިދާޅުވި ގޮތުގައި، ހަނިމާދޫގައި މިހާރު ކުރިއަށްދާ އިންޓަނޭޝަނަލް އެއާޕޯޓުގެ މަޝްރޫޢު ނިމުމާއެކު، ކުޑަ ސީޕްލޭން ޓާމިނަލެއް އަޅައި އޮޕަރޭޝަންތައް ފެށުމަށް ވަނީ ރޭވިފައެވެ.
މުޖުތަބާ އިތުރަށް ފާހަގަކުރެއްވި ގޮތުގައި، ރާއްޖޭގައި އިންޓަނޭޝަނަލް އެއާޕޯޓެއްގެ ކާމިޔާބީ ބިނާވެގެންވަނީ ކައިރީގައި ހުންނަ ރިސޯޓުތަކަށް ފަސޭހައިން ދަތުރުކުރެވޭ މިންވަރެއްގެ މައްޗަށެވެ. އެގޮތުން ހަނިމާދޫ އެއާޕޯޓަށް އަންނަ ފަސިންޖަރުންނަށް 180 ކިލޯމީޓަރުގެ ސަރަހައްދުގައި ހުރި ރިސޯޓުތަކަށް ފަސޭހައިން ދަތުރުކުރެވޭނެ ނަމަ، އެއާޕޯޓް ކާމިޔާބުވާނެ ކަމަށް އެމަނިކުފާނު ވިދާޅުވިއެވެ.
ވެލާނާ އިންޓަނޭޝަނަލް އެއާޕޯޓަށް ޖައްސާ ސީޕްލޭންތައް ހަނިމާދޫގައި ގާއިމުކުރާ ސީޕްލޭން ޓާމިނަލަށް ޖެއްސުމަކުން އެއްވެސް މައްސަލައެއް ނުޖެހޭނެ ކަމަށްވެސް މުޖުތަބާ ވިދާޅުވިއެވެ.
ރާއްޖޭގެ އެންމެ އުތުރުގައި ހުރި އެއާޕޯޓުތަކުގެ ތެރެއިން ހަނިމާދޫ އެއާޕޯޓް ތަރައްގީކުރުމުގެ މަސައްކަތް ވަނީ އިންޑިއާގެ ޖޭއެމްސީ ޕްރޮޖެކްޓްސްއާ ހަވާލުކުރެވިފައެވެ. މި މަޝްރޫޢަކީ އިންޑިއާގެ އެގްޒިމް ބޭންކުގެ ލޯނު އެހީގެ ދަށުން ކުރިއަށްގެންދާ މަޝްރޫޢެކެވެ.
މި މަޝްރޫޢުގެ ދަށުން 2460 މީޓަރުގެ އައު ރަންވޭއަކާއި، 111,000 އަކަފޫޓުގެ ޒަމާނީ ޓާމިނަލެއް އެޅުމަށް ވަނީ ހަމަޖެހިފައެވެ. މީގެ އިތުރުން 624,000 އަކަފޫޓުގެ އޭޕްރަނަކާއި ބައިނަލްއަގުވާމީ ދަތުރުތައް އިތުރުކުރުމަށް ބޭނުންވާ އެހެނިހެން ވަސީލަތްތައްވެސް ގާއިމުކުރުމަށް ވަނީ ނިންމާފައެވެ.
