ރާއްޖޭގެ ކަނޑުގެ ސަރަހައްދުން އަތުލައިގަތް ބޯޓުން ފެނުނު މަސްތުވާތަކެތީގެ މަގުމަތީ އަގު އެއް ބިލިއަން ދިވެހި ރުފިޔާއަށް އަރާނެ ކަމުގައި ފުލުހުން މިއަދު ބޭއްވި ކުއްލި ނޫސްވެރިންގެ ބައްދަލުވުމުގައި ހާމަކޮށްފިއެވެ. ފުލުހުންގެ ކޮމިޝަނަރު އަލީ ޝުޖާއު ވިދާޅުވި ގޮތުގައި، ސްރީލަންކާގެ މި މަސްބޯޓުން ޖުމްލަ 468.6 ކިލޯގެ މަސްތުވާތަކެތި ވަނީ ފެނިފައެވެ.
ތަޙުޤީޤުގެ ފުރަތަމަ މަރުހަލާގައި ކުރެވުނު ޓެސްޓުތަކުން ދައްކާގޮތުގައި، މި ތަކެތީގެ ތެރޭގައި 344 ކިލޯގެ މެތާއި 124 ކިލޯގެ ކޮކެއިން ހިމެނެއެވެ. ނަމަވެސް، ތަޙުޤީޤު އަދި ވަރަށް ކުރީ މަރުހަލާއެއްގައި އޮތުމާއެކު، މި މަސްތުވާތަކެއްޗަކީ ރާއްޖޭގެ އެއްވެސް ޑްރަގް ނެޓްވޯކަކާ ގުޅުންހުރި އެއްޗެހިކަން އަދި ކަށަވަރުކުރެވިފައި ނުވާކަން ޝުޖާއު ވަނީ ހާމަކުރައްވާފައެވެ.
ސިފައިންގެ ރިޕޯޓުގައިވާ ގޮތުން، ހދ. މަކުނުދޫ ބޭރުން މި ސްރީލަންކާ މަސްބޯޓު އަތުލައިގަނެވިފައިވަނީ ރޭ ދަންވަރު 12:40 ހާއިރުއެވެ. މިއަދު ހެނދުނު ކުޅުދުއްފުށި ސިޓީގެ ބަނދަރަށް ގެނެވުނު އުޅަނދު، ކޯސްޓްގާޑާއި ކުޅުދުއްފުށީ ފުލުހުން ގުޅިގެން ބަލައި ފާސްކުރަން ފެށީ ހެނދުނު 9:30 ހާއިރުއެވެ. ފުލުހުން ހާމަކުރިގޮތުގައި، އުޅަނދު އަތުލައިގަތްއިރު އޭގައި ތިބީ ސްރީލަންކާއަށް ނިސްބަތްވާ 5 ފިރިހެނުންނެވެ.
