2028 ވަނަ އަހަރުގެ ރިޔާސީ އިންތިޚާބުގައި ވާދަކުރައްވަން އެމްޑީޕީގެ ޕްރައިމަރީއަށް ކުރިމަތިލައްވާ ނަމަ، މިހާރުގެ ޗެއާޕާސަން ފައްޔާޒު އިސްމާޢީލް އެ މަޤާމުން އިސްތިޢުފާ ދެއްވުމަކީ އެންމެ އިންސާފުވެރި ގޮތް ކަމަށް އެމްޑީޕީގެ ކުރީގެ ޗެއާޕާސަން މޫސާ މަނިކު (ރީކޯ މޫސާ) މިއަދު ވިދާޅުވެއްޖެއެވެ.
އިއްޔެ ފައްޔާޒު މަސްމާރުކޭޓަށް ވަޑައިގެން އެތަނުގެ މަސްވެރިންގެ ހާލު ބައްލަވާލެއްވުމަށްފަހު، އެ ފޮޓޯތައް އެމްޑީޕީގެ އެކްސް އެކައުންޓުން ހާމަކުރުމާ ގުޅިގެން އުފެދުނު ނުތަނަވަސްކަމުގެ ތެރޭގައި ފައްޔާޒު ވަނީ 2028 ވަނަ އަހަރުގެ ރިޔާސީ އިންތިޚާބަށް ޕްރައިމަރީގައި ވާދަކުރައްވާނެކަން އިޢުލާންކުރައްވާފައެވެ. މިހާރު އެކަމަށް ފައްޔާޒުގެ ސަޕޯޓަރުން ދަނީ ކެމްޕޭން ކުރަމުންނެވެ.
ފައްޔާޒާ ސިޔާސީގޮތުން ޚިޔާލު ތަފާތުވުންތަކެއް ހުރި މޫސަ ބައެއް މީޑިއާތަކަށް މައުލޫމާތު ދެއްވަމުން ވިދާޅުވެފައިވަނީ އެމްޑީޕީގެ ޗެއާޕާސަންކަމަކީ ވަރަށް ބާރުގަދަ މަޤާމެއް ކަމަށާއި، އަދި ޕްރައިމަރީއަށް ތިން އަހަރަށްވުރެ ގިނަ ދުވަސް އޮއްވާ، އެ މަޤާމުގެ ބާރުތަކާއި ވަސީލަތްތައް ބޭނުންކޮށްގެން ކެމްޕޭން ކުރުމަކީ އިންސާފުވެރިކަމެއް ނޫން ކަމުގައެވެ.
މޫސާ ވިދާޅުވިގޮތުގައި އެމްޑީޕީގެ ތާރީޚުގައިވެސް މިކަން ކުރެވިފައިވަނީ މިގޮތަށެވެ. މިސާލަކަށް އެމްޑީޕީގެ ފުރަތަމަ ޕްރައިމަރީގައި މޫސާއާއި ޑރ. މުޙައްމަދު މުނައްވަރު ވާދަކުރެއްވިއިރު، އޭރުގެ ޗެއާޕާސަން ރައީސް މުޙައްމަދު ނަޝީދު އެ މަޤާމުން އިސްތިޢުފާ ދެއްވިއެވެ.
އެމްޑީޕީގެ ރައީސް ޢަބްދުﷲ ޝާހިދު އިއްޔެވަނީ ފައްޔާޒު އެމްޑީޕީގެ އިސްވެރިންގެ ނަމުގައި މަސްމާރުކޭޓަށް ވަޑައިގެންނެވި މައްސަލައިގައި ހިތްހަމަނުޖެހުން ފާޅުކުރައްވާފައެވެ. ޕްރައިމަރީގައި ވާދަކުރައްވާނެ ކަމަށް ބެލެވޭ ޝާހިދު ނުރުހުން ފާޅުކުރެއްވީ އެކަން އޭނާއަށް އެންގެވުމެއްނެތި ކުރިއަށް ގެންދެވުމާ ގުޅިގެންނެވެ.
އެހެންނަމަވެސް، މަޢުލޫމާތު ލިބިފައިވާ ގޮތުގައި ފައްޔާޒު މަސްމާރުކޭޓަށް ވަޑައިގެންނެވީ ދުރާލާ ރޭވިގެނެއް ނޫނެވެ. އެއީ މަސްވެރިއަކު ދެއްވި ދަޢުވަތަކަށް ކުއްލިގޮތަކަށް ވަޑައިގެންނެވި ވަޑައިގަތުމެކެވެ.
ކުރިއަށް އޮތް ރިޔާސީ އިންތިޚާބުގައި ކުރީގެ ރައީސް އިބްރާހީމް މުޙައްމަދު ޞާލިޙް (އިބޫ) އެމްޑީޕީގެ ފަރާތުން އަލުން ވާދަކުރައްވާނެ ކަމަށް ބައެއް ބޭފުޅުން ޤަބޫލުކުރެއްވި ނަމަވެސް، އެކަމާމެދު އެމަނިކުފާނު އަދި ވަކި ގޮތެއް ވިދާޅުވެފައެއް ނުވެއެވެ.
ނަމަވެސް މިދިޔަ ހަފުތާގައި ރާއްޖެ ޓީވީއަށް ދެއްވި އިންޓަވިއުއެއްގައި އިބޫ ވިދާޅުވެފައިވަނީ އެމަނިކުފާނުގެ ސިޔާސީ މުސްތަޤުބަލާ ގުޅޭގޮތުން އެމްޑީޕީގެ އިސްވެރިންނާ މަޝްވަރާކުރައްވާފައިވާ ކަމަށާއި، މިހާރުވެސް "ހަތަރު ފަސް" މެންބަރަކު ޕްރައިމަރީގައި ވާދަކުރުމަށް ޝައުޤުވެރިކަން ފާޅުކުރައްވާފައިވާ ކަމަށެވެ.
