ގއ. ކަނޑުހުޅުދޫގައި ރޭ ހިންގި މާރާމާރީއެއްގައި އެކަކުގެ ހާލު ސީރިއަސްވުމާ ގުޅިގެން އިތުރު ފަރުވާއަށް މާލެ ގެނައުމަށް ހަމަޖެހިއްޖެއެވެ.
ފުލުހުން ބުނީ ކަނޑުހުޅުދޫގައި ދެ މީހެއްގެ ދެމެދުގައި މާރާމާރީއެއް ހިންގި މައްސަލައެއް ރޭ ރިޕޯޓުކުރި ކަމަށެވެ. މާރާމާރީގައި އެ ދެ މީހުންނަށް ވެސް އަނިޔާވި އިރު، އެއީ 37 އަހަރުގެ ދިވެހި ފިރިހެނަކަށާއި 40 އަހަރުގެ ދިވެހި ފިރިހެނަކެވެ.
އެ ދެ މީހުންނަށް މިހާރު ފަރުވާ ދެމުން އަންނަނީ ގއ. ވިލިނގިލީގައި ހުންނަ އަތޮޅު ހޮސްޕިޓަލުގައެވެ.
މާރާމާރީގައި ޒަހަމްވި އެކަކުގެ ކޮނޑު ކަށިގަނޑާއި ހަމައިން ދެ އިންޗިއެއްހާ ތަން ކަފައިގެން ގޮސް، އޭނާގެ ގައިގެ އެކި ތަންތަނުގައި ޒަހަމްތައް ހުއްޓެވެ. އަދި ދެވަނަ މީހާގެ ބޮލުގެ ބައެއް ވަރަށް ބޮޑަށް ކަފައިގެން ގޮސް، އޭނާގެ ބޮލުގެ ނާށިގަނޑު ވެސް ހުރީ ބޭރަށް ފެންނާށެވެ.
