އޭޑީކޭ ހޮސްޕިޓަލުގެ ނަމުގައި ފޮނުވަމުންދާ ސްކޭމް މެސެޖުތަކާއި ލިންކްތަކާ ގުޅިގެން އާންމު ރައްޔިތުން ސަމާލުވުމަށް އެ ހޮސްޕިޓަލުން އިލްތިމާސްކޮށްފިއެވެ. އެ ހޮސްޕިޓަލުގެ ރަސްމީ އެސްއެމްއެސް ހޭންޑަލް މެދުވެރިކޮށް މި ފަދަ މެސެޖުތައް ފޮނުވަމުންދާކަން ވަނީ ހޮސްޕިޓަލުގެ ސަމާލުކަމަށް އައިސްފައެވެ.
މި ފަދަ މެސެޖުތަކަށް ޖަވާބު ދިނުމުން ދުރުހެލިވުމަށާއި، މެސެޖުގައި ހިމެނޭ ލިންކްތައް ނުހުޅުވުމަށް އޭޑީކޭ ހޮސްޕިޓަލުން ވަނީ އާންމުންނަށް އިލްތިމާސްކޮށްފައެވެ. މިއީ އާންމު ރައްޔިތުންގެ މަޢުލޫމާތު ހޯދުމަށް ކުރެވޭ މަސައްކަތެއްކަމަށް ފާހަގަކުރަމުން، މި މައްސަލަ ހައްލުކުރުމަށް މަސައްކަތް ކުރަމުންދާ ކަމަށް އެ ހޮސްޕިޓަލުން މަޢުލޫމާތު ދީފައިވެއެވެ.
އަދި މިފަދަ މެސެޖެއް ލިބިއްޖެނަމަ، އޭގެ ޞައްޙަކަން ކަށަވަރުކުރުމަށްފަހު ނޫނީ އެއްވެސް ފިޔަވަޅެއް ނޭޅުމަށް އޭޑީކޭ ހޮސްޕިޓަލުން ވަނީ އެދިފައެވެ. މިފަދަ ސްކޭމް ކޯލްތަކާއި މެސެޖުތައް މެދުވެރިކޮށް އާންމުންގެ އަތުން ފައިސާ އޮޅުވާލައިގެން ހޯދުމުގެ މައްސަލަތައް ވަނީ އިތުރުވެފައިވާ ކަމަށާއި، މި މައްސަލައަށް އަދިވެސް އެކަށީގެންވާ ހައްލެއް ލިބިފައިނުވާ ކަމަށް ފާހަގަކޮށްފައިވެއެވެ.
