ދިވެހިރާއްޖެއާއި ތުރުކީވިލާތާ ދެމެދު މިމަހުގެ 4 ވަނަ ދުވަހު ސޮއިކުރެވުނު މިނިވަން ވިޔަފާރީގެ އެއްބަސްވުމަށް އަންނަ އަހަރުގެ ފުރަތަމަ ކުއާޓަރގައި އަމަލުކުރަން ފަށާނެ ކަމަށް އިޤްތިޞާދީ ތަރައްޤީއާއި ވިޔަފާރިއާބެހޭ ވަޒީރު މުޙައްމަދު ސަޢީދު ހާމަކުރައްވައިފިއެވެ.
ޕީއެސްއެމްނިއުސްގެ ހަފްތާ 52 ޕްރޮގްރާމުގައި ވާހަކަފުޅު ދައްކަވަމުން ވަޒީރު ވިދާޅުވީ މި އެއްބަސްވުމުގެ ދަށުން ތުރުކީވިލާތުން ރާއްޖެއަށް އެތެރެކުރާ ގިނަ އަދަދެއްގެ މުދަލުން ޑިއުޓީ މަޢާފުވެގެންދާނެ ކަމަށެވެ. މިއީ އިންވެސްޓަރުންނާއި، ރިސޯޓު ތަރައްޤީކުރާ ފަރާތްތަކާއި، އާންމު ވިޔަފާރިވެރިންނަށް ލިބިގެންދާނެ ވަރަށް ބޮޑު ކުރިއެރުމެއް ކަމުގައި ވަޒީރު ފާހަގަކުރެއްވިއެވެ.
މި އެއްބަސްވުމުގެ ސަބަބުން ދިވެހިރާއްޖެއިން ތުރުކީއަށް އެކްސްޕޯޓްކުރާ މަހުގެ ބާވަތްތަކަށް ލުއިތަކެއް ލިބި، ވިޔަފާރީގެ ހުރަސްތައް ކުޑަވެ، ދެޤައުމުގެ ދެމެދުގައި ވިޔަފާރީގެ ގުޅުން ބަދަހިވެގެންދާނެއެވެ. އަދި ދިވެހި މަސްވެރިންނަށް ތުރުކީގެ މާކެޓުގައި ވިޔަފާރި ފުޅާކުރުމުގެ ފުރުސަތު ލިބި، ދިވެހި ރައްޔިތުންނަށް ތުރުކީގެ އުފެއްދުންތައް އަގުހެޔޮކޮށް ލިބޭނެއެވެ.
މީގެއިތުރުން، ޗައިނާއާއެކު 2014 ވަނަ އަހަރު ސޮއިކުރެވުނު މިނިވަން ވިޔަފާރީގެ އެއްބަސްވުމަށް އަންނަ އަހަރުގެ ޖެނުއަރީ 1 ވަނަ ދުވަހުން ފެށިގެން އަމަލުކުރަން ފެށުމަށް ސަރުކާރުން ދަނީ ތައްޔާރުވަމުންނެވެ. މި އެއްބަސްވުމުގެ ދަށުން ޗައިނާއިން ރާއްޖެއަށް އެތެރެކުރާ މުދަލުގެ 95 އިންސައްތައިން ޑިއުޓީ ކުޑަކުރެވިގެންދާނެ ކަމަށް ވަޒީރު ސަޢީދު ވިދާޅުވިއެވެ. މިހާރުވެސް ދެޤައުމުގެ ދެމެދުގައި 700 މިލިއަން ޑޮލަރުގެ ވިޔަފާރި ކުރެވެމުންދާއިރު، މި އެއްބަސްވުމަށް އަމަލުކުރަން ފެށުމާއެކު އެ އަދަދު 1 ބިލިއަން ޑޮލަރަށް އިތުރުވާނެ ކަމަށް ސަރުކާރުން ލަފާކުރައްވައެވެ.
