އިންޓަނޭޝަނަލް ކްރިމިނަލް ކޯޓުން ވަނީ އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އަދި އިޒްރޭލުގެ ކުރީގެ ޑިފެންސް މިނިސްޓަރު ހައްޔަރުކުރުމަށް ނެރުނު އަމުރަށް ދިވެހި ސަރުކާރުން މަރުހަބާ ވިދާޅުވެއްޖެއެވެ.
ބައިނަލްއަގުވާމީ ޖިނާއީ ކޯޓުން މި އަމުރު ނެރެފައިވަނީ 2023 ވަނަ އަހަރުގެ އޮކްޓޯބަރު 8 އިން 2024 ވަނަ އަހަރުގެ މެއި 20 އާ ދެމެދު ހިންގާފައިވާ ހަނގުރާމައިގެ އަދި އިންސާނިއްޔަތާ ޚިލާފު ޖަރީމާތަކުގެ ތުހުމަތުގައެވެ.
ރައީސް ޑރ. މުޙައްމަދު މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ، މިއީ ހަނގުރާމައިގެ ޖަރީމާތަކާއި އިންސާނިއްޔަތާ ޚިލާފު ޖަރީމާތަކަށް ޒިންމާދާރުކުރުވުމަށް އެޅޭ މުހިންމު ފިޔަވަޅެއް ކަމަށެވެ. އަދި މެދުއިރުމަތީގެ ސުލްހައަށް ޓަކައި ބައިނަލްއަގުވާމީ ގާނޫނުތައް ނަގަހައްޓައި ފަލަސްތީނުގެ ރައްޔިތުންނަށް އިންސާފު ހޯދައިދިނުމަކީ ކޮންމެހެން ކުރަންޖެހޭ ކަމެއްކަން ފާހަގަކުރައްވާފައިވެއެވެ.
The #Maldives welcomes the @IntlCrimCourt’s decisions today with regard to the situation in the State of Palestine. This is a crucial step towards ensuring accountability for war crimes and crimes against humanity.
The Maldives respects the decisions of the ICC and underscores…
— Dr Mohamed Muizzu (@MMuizzu) November 21, 2024
މީގެ ކުރިން، އިޒްރޭލުން ފަލަސްތީނަށް ދެމުންދާ ހަމަލާތަކާ ގުޅިގެން، އިޒްރޭލު ޕާސްޕޯޓު ހިފެހެއްޓުމަށް ގާނޫނީ އިސްލާހުތަކެއް ގެނައުމަށް ވަނީ މަސައްކަތްތަކެއް ކުރެވިފައެވެ. މިގޮތުން މިދިޔަ ޖޫން މަހު ކެބިނެޓުން ވަނީ އިޒްރޭލު ޕާސްޕޯޓު ހިފެހެއްޓުމަށް ނިންމައި، ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް އެކަމާ ގުޅޭ ބިލެއް މަޖިލީހަށް ހުށަހަޅުއްވާފައެވެ.
އެހެންނަމަވެސް، މި ބިލުގެ މަސައްކަތް ލަސްވަމުން ދިއުމާއެކު، ވެރިކަންކުރާ ޕީއެންސީގެ މެންބަރުން މިހާރު ވިދާޅުވަމުން ގެންދަވަނީ މި ފިޔަވަޅު އަޅަންވާނީ އެކަށީގެންވާ ދިރާސާތަކަކަށްފަހު، ފަތުރުވެރިކަމުގެ ދާއިރާގެ ފަރާތްތަކާ މަޝްވަރާކުރުމަށްފަހު ކަމަށެވެ. ނަމަވެސް ޕީއެންސީން ވަނީ މި މަސައްކަތް ވީހާވެސް އަވަހަކަށް ނިންމާނެކަން އަންގާފައެވެ.
އިޒްރޭލުގެ ހަމަލާތަކުގައި މިހާތަނަށް 43,972 މީހުން ޝަހީދުވެފައިވާއިރު، އޭގެ ތެރޭގައި 17,000 އަށްވުރެ ގިނަ ކުޑަކުދިން ހިމެނެއެވެ. އައިސީސީގެ މެންބަރު ގައުމުތަކުގެ އަދަދު 124 އަށް އަރާއިރު، ހައްޔަރު އަމުރު ރައްދުވާ ފަރާތެއް މި ގައުމުތަކަށް ޒިޔާރަތްކޮށްފިނަމަ، އެ ފަރާތެއް ހައްޔަރުކުރުމަކީ ލާޒިމު ކަމެކެވެ. ނަމަވެސް މިފަދަ އަމުރުތައް ތަންފީޒުކުރުމުގެ ބާރު އައިސީސީއަށް ލިބިގެނެއް ނުވެއެވެ.
