ގަވައިދު އާންމުކުރުމާ ގުޅިގެން ދުންފަތުގެ ބާވަތްތަކުން ވިޔަފާރިކުރެވޭނީ އެކަމުގެ ލައިސަންސް ހޯދައިގެން ކަމަށް ހެލްތު މިނިސްޓްރީން ބުނެފިއެވެ.
ހެލްތު މިނިސްޓްރީން ކުރި އިއުލާނުގައި ބުނީ ދުންފަތް ވިއްކުމުގެ ހާއްސަ ހުއްދަ ހޯދުން ލާޒިމްވާނީ އެ ހުއްދަތައް ދިނުމުގެ އުސޫލާއި އިޖުރާއަތްތައް ކަނޑައަޅާ ބަޔާންކުރާ ގަވައިދު އާއްމުކޮށް، އެ ކަނޑައަޅާ މުއްދަތުގައި ކަމަށެވެ. އެ މުއްދަތުގެ ފަހުން، އެ ހުއްދަ ނެތި ދުންފަތުގެ އެއްވެސް ވިޔަފާރިއެއް ކުރުމަކީ މަނާ ކަމެއް ކަމަށް އޭގައިވެއެވެ.
ގަވައިދާ ހިލާފަށް ދުންފަތުގެ ބާވަތްތަކުން ވިޔަފާރިކޮށްފިނަމަ އޭގެ ލައިސެންސް ބާތިލްކުރެވޭނެ ކަމަށް ބުނެފައިވެއެވެ.
ގާނޫނުގައިވާ ގޮތުން ހުއްދަ ނުނަގާ، އުސޫލާ ހިލާފަށް ދުންފަތުގެ ބާވަތްތަކުގެ ވިޔަފާރި ކުރާނަމަ 1،000-1،000،000ރ. އާ ދެމެދުގެ އަދަދަކުން ޖޫރިމަނާކުރާނެއެވެ.
ދުންފަތް ކޮންޓްރޯލްކުރުމާ ބެހޭ ގާނޫނަށް ގެނައި 1 ވަނަ އިސްލާހަށް މިދިޔަ ހުކުރު ދުވަހުން ފެށިގެން ވަނީ އަމަލުކުރަން ފަށައިފައެވެ.
