ތައުލީމީ ދާއިރާއަށް ހާއްސަކޮށްގެން "އެޑިޔުކޭޝަން ސެންޓަރ ފޯ އެކްސެލެންސް" ސެންޓަރުތަކެއް ރާއްޖޭގެ އެކި ސަރަޙައްދުތަކުގައި ގާއިމްކުރުމަށް ނިންމާފައިވާކަމަށް އެޑިޔުކޭޝަން މިނިސްޓަރު ޑރ. އިސްމާއީލް ޝަފީއު ވިދާޅުވެއްޖެއެވެ.
ދައުލަތުގެ މީޑިއާގެ ޕްރޮގްރާމެއްގައި ވާހަކަދައްކަވަމުން މިނިސްޓަރު ފާހަގަކުރެއްވި ގޮތުގައި، އަންނަ އަހަރަށް ހުށަހެޅިފައިވާ 56.6 ބިލިޔަން ރުފިޔާގެ ބަޖެޓުން ތައުލީމީ ދާއިރާއަށް 6.1 ބިލިޔަން ރުފިޔާ ވަނީ ކަނޑައަޅާފައެވެ. މި ބަޖެޓުން އެންމެ އިސްކަމެއް ދެވޭނީ މުދައްރިސުންގެ ފަންނީ ގާބިލުކަން އިތުރުކުރުމަށެވެ. މިގޮތުން ގާއިމުކުރެވޭ ސެންޓަރުތަކުން މުދައްރިސުންނާއި ޕްރިންސިޕަލުންނަށް ބޭނުންވާ ޕްރޮފެޝަނަލް ޑިވެލޮޕްމަންޓް ފޯރުކޮށްދީ، ސްކޫލް އިވެލުއޭޝަންގެ މަސައްކަތްތައް މިހާރަށްވުރެ ހަރުދަނާ ކުރެވޭނެއެވެ.
ފާހަގަކޮށްލެވޭ ގޮތުގައި، މިމަހުގެ ހަތްވަނަ ދުވަހު ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ވަނީ މުދައްރިސުން ތަމްރީނުކުރުމުގެ ޤައުމީ ޕްރޮގްރާމެއް އިފްތިތާޙްކުރައްވާފައެވެ. މި ޕްރޮގްރާމަކީ ރާއްޖޭގެ ތަޢުލީމީ ދާއިރާއަށް ދިމާވެފައިވާ މުދައްރިސުން ލިބުމުގެ ދަތިކަމަށް ހައްލެއް ހޯދުމަށާއި، ދޭސީ މުދައްރިސުން އިތުރުކުރުމަށް އަމާޒުކޮށްގެން، މަތީ ސާނަވީ ތަޢުލީމު ނިންމާ ދަރިވަރުންނަށް، ރައީސުލްޖުމްހޫރިއްޔާގެ ސީދާ ބެއްލެވުމުގެ ދަށުން ފަށާފައިވާ ތަމްރީނު ޕްރޮގްރާމެކެވެ.
