އަންނަ އަހަރުން ފެށިގެން މުއާސަލާތީ ހިދުމަތް ދޭ ފަރާތްތަކުގެ އަތުން ފީއެއް ނަގަން އަންނަ އަހަރަށް ލަފާކުރާ ދައުލަތުގެ ބަޖެޓުގައި ހިމަނައިފިއެވެ.
އަންނަ އަހަރަށް ލަފާކޮށް ހުށަހެޅި 55.6 ބިލިއަން ރުފިޔާގެ ބަޖެޓުގައި ދައުލަތުގެ ފިސްކަލް އަދި ދަރަނީގެ ދެމެހެއްޓެނިވިކަން އިއާދަކޮށް، ބޭރުގެ ފައިސާއިން ސަރުކާރުން ކުރަން ޖެހޭ ހަރަދުތައް ކުރުމުގެ ގާބިލްކަންް އިތުރުކުރުމަށް ޑޮލަރުން ލިބޭ އާމްދަނީ އިތުރު ކުރަން ސިޔާސަތުތަކެއް ވަނީ ހިމަނައިފައެވެ.
އެގޮތުން ރާއްޖޭގެ ރޭޑިއޯ ފްރިކުއެންސީ ސްޕެކްޓްރަމް ހަރުދަނާކަމާ އެކު ބެލެހެއްޓުމަށް ފްރިކުއެންސީ ސްޕެކްޓްރަމް ޗާޖެއް ނެގުމަށް ހިމަނާފައިވެއެވެ.
އެކަން ކުރާނީ އެކަމާ ގުޅޭ ގާނޫނާއި ގަވާއިދުތަކަށް ބަދަލު ގެނެސްގެންނެވެ. ނަމަވެސް އެ ފީ ނަގައިގެން ދައުލަތަށް ލިބޭނެ ކަމަށް ލަފާކުރާ އާމްދަނީއެއް ބަޖެޓްގައި ހިމަނާފައި ނެތެވެ. އަންނަ އަހަރު ދައުލަތަށް 39 ބިލިއަން ރުފިޔާގެ އާމްދަނީއެއް ލިބޭނެ ކަމަށް ލަފާކޮށްފައިވެއެވެ.
