ކުރީގެ ރައީސް އިބްރާހިމް މުހައްމަދު ސޯލިހްގެ ސަރުކާރުން އިއުލާނު ކުރި 4،000 ފްލެޓު ލިސްޓު ލަސްވަނީ އުސޫލާ ހިލާފަށް ގިނަ ކަންތައްތަކެއް ކޮށްފައި ހުރުމުން ކަމަށް ވިދާޅުވެ، އެކަމުގެ ތަފްސީލްތައް ރައީސް ޑރ. މުހައްމަދު މުއިއްޒު ރޭ ދެއްވައިފިއެވެ.
ސަރުކާރަށް އެއް އަހަރު ފުރުން ފާހަގަ ކުރަން ސޯޝަލް ސެންޓަރުގައި ބޭއްވި ޖަލްސާގައި ރައީސް ޑރ. މުއިއްޒު ވިދާޅުވީ ގެޒެޓުކޮށްފައި އޮތް އެއްވެސް ލިސްޓެއް އަތުލުމަކީ އެމަނިކުފާނުގެ ސިޔާސަތެއް ނޫން ކަމަށެވެ. އެގޮތުން ފްލެޓެއް ނުވަތަ ގޯއްޗެއް ވެސް އަތުނުލައްވާނެ ކަމަށް ވިދާޅުވިއެވެ.
ނަމަވެސް، އަބަދު ވެސް ކަންކުރާ އުސޫލުން ގަވާއިދާ ހިލާފަށް އޮޅުވައިލައިގެން މަކަރު ހަދައިގެން ޑޮކިއުމަންޓްސްތައް ނުލާ އެކަން ކޮށްފައި އޮވެއްޖެ ނަމަ، އެމީހަކަށް ފްލެޓެއް ނުލިބޭނެ ކަމަށް ރައީސް ޑރ. މުއިއްޒު ވިދާޅުވިއެވެ.
"ފްލެޓު ލިސްޓުގައި މި ވެގެން އުޅޭ ގޮތަކީ ހައުސިން މިނިސްޓްރީން ވަރަށް ގިނަ ވަގުތު ހޭދަކުރޭ އެކަމުގައި. އަދި އެކަމަށްޓަކައި ނަގާފައި އޮތް ކޮމެޓީތަކުން ވެސް އެކަން އޯވަސީ ކުރަމުން އެ ގެންދަނީ. އެކަން މި ކުރަނީ އެއްވެސް ފަރާތެއްގެ ނުފޫޒު އެއަށް ނުވަންނަ ގޮތަށް، އެއްވެސް ފަރާތެއްގެ ނުފޫޒެއް ނުފޯރުވޭނެ. އެކަމެއް ނުކުރެވޭނެ." ރައީސް ވިދާޅުވިއެވެ.
ރައީސް ވިދާޅުވި ގޮތުގައި ހުޅުމާލެ ދެވަނަ ފިޔަވަހިން ހުރިހާ ގޯތިތަކެއް ދީ ނިންމީ ވެސް ތެދު މައުލޫމާތު ހުށަހަޅާފައި އޮތުމުންނެވެ. ހުޅުމާލެ 3، ގުޅިފަޅު އަދި ގިރާވަރުފަޅު ހިއްކާ ނިމޭއިރަށް އެ ތަންތަނުން ވެސް ގޯތި ހަވާލު ކުރައްވާނެ ކަމުގެ ޔަގީންކަން ރޭގައި ވެސް ރައީސް ދެއްވިއެވެ.
ރައީސް ވިދާޅުވީ، ފްލެޓު ލިސްޓާ ގުޅިގެން އެންޓި ކޮރަޕްޝަން ކޮމިޝަން (އޭސީސީ) އިން ބެލި ބެލުމުން އުސޫލާ ހިލާފަށް ކޮށްފައި ހުރި ކަންކަން ފާހަގަވެފައިވާ ކަމަށެވެ.
ފްލެޓު ލިސްޓުގައި ބަލަންޖެހޭ ކަންކަން ވަރަށް ގިނަ ކަމަށާއި ކުރީގެ ސަރުކާރުން އުފެއްދި ފްލެޓު ކޮމިޓީގެ ސިޔާސީ މެމްބަރުންނަށް އުސޫލާ ހިލާފަށް ފްލެޓު ލިބޭ ގޮތަށް މާކްސް ބަދަލުކޮށްފައިވާ ކަމަށް ރައީސް ވިދާޅުވިއެވެ. އެކަމުގެ ތަފްސީލްތައް އާންމު ކުރައްވާނެ ކަމަށް ވިދާޅުވިއެވެ.
ކުރީގެ ސަރުކާރުގެ އިސްވެރިންގެ އާއިލާ މީހުންނާއި ނުފޫޒު ގަދަ އާއިލާގައި ގިނަ ބަޔަކަށް ފްލެޓުތައް ބަހާލާފައިވާ ކަމަށް ވެސް ރައީސް ވިދާޅުވިއެވެ. ޕޯޓަލް އަށް ހުށަހެޅި ލިޔުންތަކުގެ އިތުރުން ބައެއް މީހުން ހުށަހެޅި ލިޔުންތައް ބަލައިގަނެ ފްލެޓު ދީފައިވާ ކަމަށާއި ހަމައެކަނި އައިޑީ ކާޑު ހުށަހަޅައިގެން ވެސް ބައެއް މީހުންނަށް ފްލެޓު ދީފައިވާ ކަމަށް ރައީސް ވިދާޅުވިއެވެ.
"ދެން އެ ބޭފުޅުން ކޮން ވާހަކައެއްތޯ މި ދައްކަވަނީ؟ އުސޫލާ ހިލާފަށް ބައެއް ފަރާތްތަކަށް ފްލެޓު ދިނުމަށްޓަކައި ޕޯޓަލްގެ ބެކްއެންޑުން މާކްސް ޝީޓު ބަދަލުކޮށްފައި އެބަހުރި. ދެން އެ ބޭފުޅުން ކިހާ ވަރަކަށް މިކަމާ އުޅޭނެ ނޫންތޯ؟ އެހެންވީމަ ލަސްވަނީ. އެހެންވީމާ ލަސްވާނެ ދެއްތޯ. މި ހުރިހާ ކަމެއް ބަލާފައި އިރާދަކުރެއްވިއްޔާ އަޅުގަނޑުމެން މިކަން ނިންމަދޭނަން އިންސާފުވެރިކަމާ،" ރައީސް ވިދާޅުވިއެވެ.
ރައީސް ވިދާޅުވީ ފްލެޓު ލިސްޓް އާންމުކުރާ އިރު، ފްލެޓު ނުލިބޭ މީހާގެ ކައިރީގައި ފްލެޓު ނުލިބުނު ސަބަބު ވެސް ލިޔެފައި އޮންނާނެ ކަމަށެވެ.
"ލިސްޓު ނެރޭއިރުގައި ކޮންމެ މީހެއްގެ ނަން ކައިރީގައި އޮންނާނެ ތަފްސީލު. ވަރަށް ދެފުށް ފެންނަ ލިސްޓެއް ނެރޭނަށް އަޅުގަނޑުމެން. ކޮންމެ މީހެއްގެ ތަފްސީލު އަޅުގަނޑުމެން ހޮވުނު ގޮތް ވިޔަސް ނުހޮވުނު ގޮތް ވިޔަސް އޮންނާނެ،" ރައީސް ވިދާޅުވިއެވެ.
އެމަނިކުފާނު ވިދާޅުވީ، ފްލެޓު ލިސްޓަށް އެއްވެސް ނުފޫޒެއް ނުފޯރުވޭނެކަމަށެވެ. އަދި އެކަންކަން ބަލައި ނިމުނުހާ އަވަހަކަށް ލިސްޓު އާންމު ކުރާނެ ކަމަށް އެމަނިކުފާނު ވިދާޅުވިއެވެ.
"އަޅުގަނޑު މިހުރީ ﷲ ގަންދީއޭ ހުވާ ކޮށްގެން. ﷲ ހުރިހާ ކަމެއް ދެނެވޮޑިގެންވޭ. އަޅުގަނޑު ކުރާނީ ތެދުވެރިކަމާ އަމާނާތްތެރިކަމާ އެކު ހުރިހާ ކަމެއް ވެސް،" ރައީސް ވިދާޅުވިއެވެ.
