ކުރީގެ ރައީސް އަބްދުﷲ ޔާމީން މިނިވަންވެ ވަޑައިގެން ހުންނެވީ ޝަރުއީ ދާއިރާއަށް ނުފޫޒު ފޯރުވުން ނިމުމަކަށް ގެނެސް، އެ ދާއިރާ އަށް ނުފޫޒު ނުފޯރުވާތީ ކަމަށް ރައީސް ޑރ. މުހައްމަދު މުއިއްޒު ރޭ ވިދާޅުވެއްޖެއެވެ.
ރިޝްވަތާއި މަނީ ލޯންޑަރިންގެ ކުށް ސާބިތުވެގެން ކުރީގެ ރައީސް އަބްދުﷲ ޔާމީން، މާފުށީ ޖަލަށްލާފައި ހުންނަވަނިކޮށް، ރިޔާސީ އިންތިހާބުގެ ކާމިޔާބީއާ އެކު ޔާމީން ގެއަށް ބަދަލުކޮށްފައި ވަނީ އޮކްޓޯބަރު 1، 2023 ގައެވެ. އޭގެ ފަހުން އެމަނިކުފާނުގެ މައްޗަށް ކުރި ހުކުމް ހައި ކޯޓުން ވަނީ ބާތިލްކޮށްފައެވެ.
ސަރުކާރަށް އެއް އަހަރު ފުރުން ފާހަގަ ކުރުމަށް ސޯޝަލް ސެންޓަރުގައި ބޭއްވި ޖަލްސާގައި ރައީސް ޑރ. މުއިއްޒު ވިދާޅުވީ އެމަނިކުފާނު ރިޔާސީ އިންތިހާބު ކާމިޔާބު ކުރެއްވުމާ ގުޅިގެން އޭރުގެ ރައީސް އިބްރާހީމް މުހައްމަދު ސޯލިހް މަރުހަބާ ދެންނެވުމަށް އެންމެ ފުރަތަމަ ކުރެއްވި ފޯން ކޯލްގައި ވެސް އެދިވަޑައިގަތީ ޔާމީން ގެއަށް ބަދަލުކޮށް ދިނުމަށް ކަމަށެވެ. އިންތިހާބީ ރައީސްގެ ހައިސިއްޔަތުން ފުރަތަމަ ފަހަރަށް ޕޯޑިއަމްގައި ވާހަކަ ދައްކަވަމުން ޔާމީން ގެއަށް ބަދަލުކޮށްދިނުމަށް އެދިވަޑައިގަތް ކަމަށް ރައީސް ވިދާޅުވިއެވެ.
ސޯލިހާ ބައްދަލު ކުރެއްވުމަށް ވަޑައިގެން އެމަނިކުފާނު އެދިވަޑައިގަތް ގޮތަށް ޔާމީން ގެއަށް ބަދަލު ކުރުމުގެ ކަންކަން ކުރިޔަށްދާތީ، އެ ކަމަށްޓަކައި ޝުކުރު ދެންނެވި ކަމަށް ވެސް ރައީސް ޑރ. މުއިއްޒު ވިދާޅުވިއެވެ.
ރައީސް ވިދާޅުވީ ނޮވެމްބަރު 17، 2023 ގެ 5:03 އިން ފެށިގެން ޝަރުއީ ދާއިރާ އަށް ނުފޫޒު ފޯރުވުން ނިމިފައިވާ ކަމަށެވެ. ރައީސް އެ އިޝާރާތް ކުރެއްވީ ވެރިކަމުގެ ހުވާ ކުރެއްވި ވަގުތަށެވެ.
"އެހެންވީމާ އެ ހިސާބުން ފެށިގެން ސިޔާސީ ހުކުމެއްގައި ހައްޔަރުކޮށްފައިހުރި ރައީސް ޔާމީން މިނިވަން ކުރުމަކީ ޝަރުއީ ދާއިރާގެ އަތްމަތީގައި އޮތް ކަމެއް. އަޅުގަނޑުމެން ޝަރުއީ ދާއިރާއަށް ނުފޫޒު ނުފޯރުވާތީ، އަލްހަމްދުﷲ އެ މަނިކުފާނު އެ ހުރީ މިނިވަންވެ ވަޑައިގެން. މީ ހަގީގަތް" ރައީސް ވިދާޅުވިއެވެ.
ރައީސް މުއިއްޒު ވިދާޅުވީ ސިޔާސީ މަގާމަކަށް އައްޔަން ކޮށްފައިވާ އެއްވެސް މީހަކު، އެ މަނިކުފާނަށް އެނގިވަޑައިގެން ޝަރުއީ ދާއިރާއަށް ނުފޫޒެއް ނުފޯރުވާ ކަމަށެވެ. އަދި ސިޔާސީ މަގާމެއްގައި ހުންނެވި ބޭފުޅަކު ޝަރުއީ ދާއިރާ އަށް ނުފޫޒު ފޯރުވާ ނަމަ، އެކަން އަންގަން އެމަނިކުފާނު އެދިވަޑައިގެންނެވިއެވެ.
"ތިއިން އެއްވެސް ބޭފުޅަކު، ރާއްޖޭގެ ރައްޔިތުން ގާތު އެދޭ ވާހަކައެއް މި ދަންނަވަނީ، އެއްވެސް ރައްޔިތަކަށް އަޅުގަނޑު އައްޔަންކޮށްފައި ހުރި މީހެއް ޝަރުއީ ދާއިރާ އަށް ނުފޫޒެއް ފޯރުވާކަމަށް ފެނިވަޑައިގަންނަވާ ނަމަ އަޅުގަނޑަށް އެކަން އަންގާލަދެއްވާ. އެ މީހަކު ވަގުތުން ވަކިކުރާނަން. ކޮންމެ މީހެއް ވިއަސް ވަކިކުރާނަން،" ރައީސް މުއިއްޒު ވިދާޅުވިއެވެ.
