ރައީސް މުއިއްޒު ގެންދަވަނީ ބާރުތައް ދަނީ މުށުތެރެއަށް ޖަމާކުރަމުން ކަމަށާއި، މި ސަރުކާރު ބަދަލުކުރަން މިރެއިން މިރެއަށް ނިކުންނަން ޖެހޭ ކަމުގައި ކުރީގެ ރައީސް އިބުރާހިމް މުހައްމަދު ސާލިހު ވިދާޅުވެއްޖެއެވެ.
އެމްޑީޕީން މިރޭ އާޓިފިޝަލް ބީޗްގައި ބޭއްވި "ފުދިއްޖެ، ފުނޑިއްޖެ" ޖަލްސާގައި ވާހަކަ ދައްކަވަމުން ކުރީގެ ރައީސް އިބްރާހިމް މުހައްމަދު ސޯލިހް ވަނީ މި ސަރުކާރަށް ވަރަށް ބޮޑަށް ފާޑު ވިދާޅުވެފައެވެ. ގިނަ އަދަދެއްގެ ބަޔަކު ބައިވެރިވި މި ޖަލްސާގައި ރައީސް ސޯލިހް ވިދާޅުވީ މިއަދުގެ ސަރުކާރަކީ ސިއްރު، ދޮގުވެރި، އަނިޔާވެރި އަދި މުނާފިގު ސަރުކާރެއް ކަމަށެވެ.
. މިއީ ސިއްރު ސަރުކާރެއް. ދޮގުވެރި ސަރުކާރެއް. އަނިޔާވެރި ސަރުކާރެއް. މުނާފިގު ސަރުކާރެއް.
ރައީސް ސާލިހު ވިދާޅުވިއެވެ.
ރައީސް ސޯލިހް ވިދާޅުވި ގޮތުގައި އެމަނިކުފާނުގެ ސަރުކާރުން ރައީސް މުއިއްޒަށް ވެރިކަން ހަވާލުކުރިއިރު ގައުމު އޮތީ ރަނގަޅު ހާލަތެއްގައި ނަމަވެސް، މިއަދު ވަނީ ގައުމު ފުނޑާލާފައެވެ. އެމަނިކުފާނު ވިދާޅުވި ގޮތުގައި މިހާރުގެ ސަރުކާރުން ޑޮލަރުގެ އަގު އިންތިހާއަށް ބޮޑުކޮށް، އަސާސީ ހައްގުތަކުން މަހުރޫމްކޮށް، މީޑިއާގެ މިނިވަންކަން ގެއްލުވާލާފައިވާ ކަމުގައެވެ.
އަދި ވިދާޅުވީ މިހާރުގެ ސަރުކާރުން ރައްޔިތުންނަށް ދޫކޮށްފައިވާ ގޯތިތަކާއި ފްލެޓްތައް އަތުލަން ރާވަމުންދާތީ، މިކަމާ ދެކޮޅަށް މިރެއިން މިރެއަށް ވެސް ރައްޔިތުން ނިކުންނަން ޖެހިއްޖެ ކަމަށެވެ.
މިއީ އަޅުގަނޑުމެން އެންމެން އެކީ ނިކުންނަން ޖެހޭ ވަގުތު. ރާއްޖެ މި އޮތީ ފުނޑިފައި،.. މިރެއިން މިރެއަށް ވެސް މިކަން ކުރަން ނިކުންނަން އަޅުގަނޑަށް ފެނޭ.
ސަރުކާރާ ދެކޮޅަށް ރައްޔިތުން އިހުތިޖާޖަށް ނިކުންނަން ގޮވާލައްވަމުން ރައީސް ސާލިހު ވިދާޅުވިއެވެ.
2025 ވަނަ އަހަރަށް ހުށަހަޅާފައިވާ ބަޖެޓާ ގުޅޭ ގޮތުން ވާހަކަފުޅު ދައްކަވަމުން ވިދާޅުވީ މިއީ ތަފްސީލެއް ނެތް، ދަރަނި ބޮޑު، ވިޔަފާރިވެރިންގެ ޖީބަށް އަތްބާނަން ރާވާފައިވާ ބަޖެޓެއް ކަމަށެވެ. އަދި ޓެކްސް ނުނަގާނެ ކަމަށް ބުނެ ވެރިކަމަށް އައި ރައީސް މުއިއްޒު މިހާރު ވަނީ ޓެކްސް ބޮޑުކުރަން ހުށަހަޅުއްވާފައި ކަމަށް ފާހަގަކުރެއްވިއެވެ.
ރައީސް ސޯލިހް އިތުރަށް ވިދާޅުވީ 2024 ވަނަ އަހަރަށް ފާސްކުރި ބަޖެޓް އަށް މަސްދުވަހުގެ ތެރޭގައި ހުސްކޮށްލާފައިވާ ކަމަށާއި، 30 ބިލިއަން ރުފިޔާ ހޭދަކުރި ގޮތުގެ އެއްވެސް ތަފްސީލެއް ސަރުކާރުން ހާމަކޮށްފައި ނުވާ ކަމަށެވެ.
