2025 ވަނަ އަހަރުގެ ނިޔަލަށް ރާއްޖޭގެ ހުރިހާ އަތޮޅަކުން އައިޑީކާޑާއި ޕާސްޕޯޓްގެ ޚިދުމަތް ލިބޭނެކަމުގައި ރައީސް ޑރ. މުޙައްމަދު މުޢިއްޒު ވިދާޅުވެއްޖެއެވެ.
ރައީސް މުއިއްޒު މިޔަޤީންކަން ދެއްވާފައިވަނީ ދަރުބާރުގޭގައި ރޭ ބޭއްވުނު ޖުމްހޫރީ ދުވަހުގެ ރަސްމީ ޖަލްސާގައި ވާހަކަ ދައްކަވަމުންނެވެ.
ރައީސް ވިދާޅުވިގޮތުގައި 2024 ވަނަ އަހަރަކީ ރާއްޖޭގައި އަމާންކަން ޤާއިމުކޮށް، ޤާނޫނު ތަންފީޒުކުރުމުގައި ކާމިޔާބު މަސައްކަތްތަކެއް ކުރެވުނު އަހަރެކެވެ. އެގޮތުން އިމިގްރޭޝަން ޤާނޫނު އެންމެ ފުރިހަމައަށް ތަންފީޒުކުރުމުގެ މަސައްކަތް ފެށިފައިވާކަން ފާހަގަކުރެއްވިއެވެ.
ދިވެހިރާއްޖޭގައި ޤާނޫނާއި ގަވާއިދާ ޚިލާފަށް އުޅެމުންދާ ބިދޭސީންގެ މައްސަލައަކީ އެއްވެސް ސަރުކާރަކަށް ހައްލު ނުކުރެވި އެތައް އަހަރަކަށް ދިގުލައިގެން ގޮސްފައިވާ މައްސަލައެއްކަން ފާހަގަކުރައްވަމުން، ރައީސް ވެރިކަމާ ހަވާލުވެވަޑައިގަތުމަށްފަހު، ގަވާއިދާ ޚިލާފަށް ބިދޭސީން ކުރަމުންދިޔަ ވިޔަފާރިތައް ހުއްޓުވުމުގެ މަސައްކަތް ފަށްޓަވާފައިވާކަމަށް ވިދާޅުވިއެވެ. މިހާތަނަށް 4700 އަށްވުރެ ގިނަ ބިދޭސީން ޑިޕޯޓްކުރެވި، އެއީ އަހަރެއްގެ ތެރޭގައި ޑިޕޯޓްކުރެވުނު އެންމެ ގިނަ އަދަދުކަމަށްވެސް ފާހަގަކުރެއްވިއެވެ. މި މައްސަލައަށް ދާއިމީ ހައްލެއް ގެންނަން ބޭނުންފުޅުވާކަމަށާއި، އެހެންނޫންނަމަ އެތެރެއިން އަންނަ މިނިވަންކަމުގެ ބުރުލަކަށް މިކަން ވެގެންދާނެކަމަށް ވިދާޅުވިއެވެ.
ހަމައެހެންމެ، ހަމައެކަނި ބޮޑެތި އިމާރާތްތަކެއް އެޅުމަކުން ސަރުކާރުގެ ބޭނުމެއް ނެތްކަމަށާއި، ހަޤީޤީ އުފާވެރިކަން ލިބޭނީ ދިރިހުރި ފަރާތަކަށް، ދިރުމަކަށް ކަމެއް ކޮށްދެވިގެންކަމުގައި ރައީސް ވަނީ ވިދާޅުވެފައެވެ.
