ރައްޔިތުންނާ ގުޅުން ހުރި މުހިންމު ތިން ކަމެއްގައި ރައްޔިތުންގެ ހިޔާލު ހޯދަން ވޯޓަކަށް ދާން ރައީސް ޑރ. މުހައްމަދު މުއިއްޒު ނިންމަވައިފިއެވެ.
މި އަހަރުގެ ޖުމްހޫރީ ދުވަހުގެ މުނާސަބަތުގައި ބޭއްވި ޖަލްސާގައި ރައީސް މުުއިއްޒު ފާހަގަ ކުރެއްވި އެއް ކަމަކީ ރައީސުލްޖުމްހޫރިއްޔާ މަގާމުގެ ހުވާކުރައްވާ ދުވަސް ނޮވެމްބަރު 17 އިގެ ބަދަލުގައި ނޮވެމްބަރު 11 އަށް ބަދަލުކުރުމެވެ. ރައީސް މުއިއްޒު ވިދާޅުވީ އެ މަނިކުފާނުގެ ވެރިކަމުގެ 5 އަހަރުގެ ދައުރުން ހަފުތާއެއް މަދުވިޔަސް، ވެރިކަމުގެ ދައުރު ނިމި، އާ ދައުރު ފެށޭ ދުވަހަކީ ނޮވެމްބަރު 11 އަށް ބަދަލު ކުރަން ބޭނުންވާ ކަމަށެވެ. ނަމަވެސް އެއީ "އަމިއްލަ އަށް ނިންމާލެވޭ ވަރުގެ ކަމެއް ނޫން" ކަމަށް ވިދާޅުވިއެވެ.
"މަޖިލީހުގެ އިއްޒަތްތެރި މެމްބަރުންނަށް ވެސް ނުނިންމޭނެއޭ. ރައްޔިތުންގެ ގާތަށް ދާން މި ޖެހެނީ. ރައްޔިތުން ގާތު އަހާލަން އެބަޖެހޭ ފެންނަ ނުފެންނަ ވޯޓަކަށް ޖުމްހޫރީ ދުވަސް، މާނައަކީ މި ދައުރު ނިމޭ ދުވަސް 2028 ގެ ނޮވެމްބަރު 11 އަށް ބަދަލުކުރަން،" ރައީސް ވިދާޅުވިއެވެ.
ރައީސް މުއިއްޒު ވިދާޅުވީ، ސިޔާސީ އޮއިވަރުގައި ޖެހުމުގެ ސަބަބުން، ކޮންމެ ފަސް އަހަރަކުން ރައީސް މަގާމުގެ ހުވާކުރައްވާ ތާރީހު ނޮވެމްބަރު 11 ގެ ބަދަލުގައި ހަފުތާއެއްހާ ދުވަސް ފަހަތަށް ކައްސާލާފައިވާ ކަމަށެވެ.
ނޮވެމްބަރު 11 ވަނަ ދުވަސް ޖުމްހޫރީ ދުވަހުގެ ގޮތުގައި ފާހަގަ ކުރަނީ 1968 ގައި ފެށި ދެވަނަ ޖުމްހޫރިއްޔަތާ ގުޅުވައިގެންނެވެ. ކޮންމެ ފަސް އަހަރަކުން މި ދުވަހަކީ ރާއްޖޭގެ ޖުމްހޫރީ ދުވަހުގެ އިތުރުން އާ ރައީސް ހުވާ ކުރައްވައި، ރިޔާސީ ދައުރު ފެށޭ ދުވަހެވެ. އެކަމަކު 2013 ވަނަ އަހަރު ރިޔާސީ އިންތިހާބުގެ ފުރަތަމަ ބުރު ސުޕްރީމް ކޯޓުން ބާތިލު ކުރުމުން އައި ލަސްވުމާ ހެދި، ކުރީގެ ރައީސް އަބްދުﷲ ޔާމީންގެ ވެރިކަން ފެށުނީ ނޮވެމްބަރު 17 ވަނަ ދުވަހުއެވެ.
އޭގެ ފަހުން، ވެރިކަމަށް ވަޑައިގެންނެވި ކުރީގެ ރައީސް އިބްރާހިމް މުހައްމަދު ސޯލިހާއި މިހާރުގެ ރައީސް މުއިއްޒު ވެސް ހުވާ ކުރެއްވި ނޮވެމްބަރު 17 ގައެވެ.
ރައީސް މުއިއްޒު ދެވަނައަށް ވިސްނުންފުޅު ހުންނެވީ ރިޔާސީ އިންތިހާބާއި ރައްޔިތުންގެ މަޖިލީހުގެ އިންތިހާބު އެއްކޮށްލައިގެން ބާއްވާ ވާހަކައެވެ. ދެ އިންތިހާބު ވަކިވަކިން ބޭއްވުމަކީ ހަރަދު ބޮޑު ގޮތެއް ކަން އެމަނިކުފާނު ފާހަގަ ކުރެއްވިއެވެ.
"ރައްޔިތުން ބޭނުންފުޅު ވަންޏާ ދެން އަންނަ ރިޔާސީ އިންތިހާބަކާ އެކީގައި، ރައްޔިތުން އެ ގޮތަށް ފެންނަ ނުފެންނަ ވޯޓަކާ އެކީގައި ނިންމަވައިފިއްޔާ އޮންނާނެ ރައްޔިތުންގެ މަޖިލިސް އިންތިހާބު. އެހެންވީމާ އެ ކަމަށް ވެސް އަޅުގަނޑު ވޯޓަކަށް ރައްޔިތުން ގާތު އަހާނަން މަޖިލިސް މެދުވެރިކޮށް،" ރައީސް ވިދާޅުވިއެވެ.
ރައީސް މުއިއްޒު ފަހު ކަމެއްގެ ގޮތުގައި ހުށަހެޅުއްވީ ރިޔާސީ އިންތިހާބުގައި ދެވަނަ ބުރަށް ނުގޮސް ފުރަތަމަ ބުރާ ހިސާބުން ބޭފުޅަކު ކަނޑައެޅުމެވެ. އެހެންވެ، ޕްރިފަރެންޝަލް ނިޒާމަކަށް އަމަލުކުރަން މިހާރު ވެސް އެޓާނީ ޖެނެރަލް އޮފީހުން އަންނަނީ ދިރާސާތައް ކުރަމުން ކަމަށް ރައީސް ވިދާޅުވިއެވެ.
"އެއްބުރުން އެއްވަނަ، ދެވަނަ ސާފުވާ ގޮތަށް، އަޅުގަނޑު ހިތުން ބައެއް ގައުމުތަކުގައި، އަވައްޓެރި ބައެއް ގައުމުތަކުގައި ވެސް އޮވޭ އެހެން. އެކަމަކު، ދިރާސާ ކޮށްފައި އަޅުގަނޑު ގަސްދުކުރަން އެއީ އަޅުގަނޑުމެންގެ ގައުމަށް އެންމެ ރަނގަޅު ގޮތް ކަމަށް ވަންޏާ ރައްޔިތުންގެ މަޖިލިސް މެދުވެރިކޮށް، އެކަން އެދޭ ކަމަށް ވަންޏާ ދެން އަންނަ ރިޔާސީ އިންތިހާބުން ފެށިގެން ދެ ބުރު ނޯންނަ ގޮތަށް، އެއްބުރުން މީހަކު ހޮވައި ނިންމޭ ގޮތަށް ކަންކަން ބަދަލުކުރަން،" ރައީސް ވިދާޅުވިއެވެ.
