ރާއްޖޭގެ އެމްބަސީއެއް އިޓަލީގައި ގާއިމުކުރަން އެ ގައުމުން ހުއްދަ ދީފައިވާ ކަމަށް ރައީސް ޑރ. މުހައްމަދު މުއިއްޒު ރޭގައި އިއުލާން ކުރައްވައިފިއެވެ.
ޖުމްހޫރީ ދުވަހުގެ މުނާސަބަތުގައި ބޭއްވި ޖަލްސާގައި ވާހަކަފުޅު ދައްކަވަމުން ރައީސް ޑރ. މުއިއްޒު ވިދާޅުވީ އިޓަލީގައި ރާއްޖޭގެ އެމްބަސީއެއް ހުޅުވަން ދިވެހި ސަރުކާރުން ހުށަހެޅުމުން އެގައުމުގެ ސަރުކާރުން އެކަމަށް ހުއްދަ ދީފައިވާ ކަމަށެވެ.
ރައީސް ވިދާޅުވި ގޮތުގައި އިޓަލީގައި އެމްބަސީއެއް ގާއިމު ކުރައްވަނީ ފަތުރުވެރިކަމުގެ ދާއިރާގައި އެ ގައުމު މުހިންމުވީމަ ކަމަށެވެ. ރާއްޖެ އަށް މިހާރު އެންމެ ގިނައިން ފަތުރުވެރިން ޒިޔާރަތް ކުރަމުން އަންނަ ގައުމުތަކުގެ ތެރޭގައި އިޓަލީވިލާތް ހިމެނެއެވެ.
އެގޮތުން ފަސް ވަނަ އަށް އެންމެ ގިނަ އިން ރާއްޖެއަށް ފަތުރުވެރިން ޒިޔާރަތް ކުރީ ވެސް އިޓަލީންނެވެ. އިޓަލީން މިހާތަނަށް އައިއިރު، 116،195 ފަތުރުވެރިން ރާއްޖެ އައިސްފައިވެއެވެ.
ރާއްޖެ އަށް ވިޔަފާރީގެ ދާއިރާ އިން މުހިއްމު އެހެން ގައުމުތަކުގައި ވެސް އެމްބަސީތަކާއި ހައި ކޮމިޝަންތައް ހުޅުވާނެ ކަމަށް ރައީސް ވިދާޅުވިއެވެ.
ރައީސް ޑރ. މުއިއްޒުގެ ޒައާމަތުގައި ތުރުކީގައި ވަނީ އެމްބަސީއެއް ގާއިމުކޮށްފައެވެ.
