ހާރިޖީ ވަޒީރު ޑރ. އަބްދުﷲ ޚަލީލު ސައުދީ އަރަބިއްޔާގެ ވެރިރަށް ރިޔާދަށް މިއަދު ފުރާވަޑައިގެންފިއެވެ. ޚަލީލު ސައުދީއަށް ފުރާވަޑައިގަތީ އަރަބް-އިސްލާމިކް ސަމިޓްގައި ބައިވެރިވެ ވަޑައިގަތުމަށެވެ.
ސޯޝަލް މީޑިއާ ޕްލެޓްފޯމް އެކްސްގައި ކުރެއްވި ޕޯސްޓެއްގައި ވަޒީރު ވިދާޅުވެފައިވަނީ ސައުދީ އަރަބިއްޔާގެ އިސްނެގުމުގެ ދަށުން ބޭއްވޭ އެކްސްޓްރާ އޯޑިނަރީ ޖޮއިންޓް އަރަބް-އިސްލާމިކް ސަމިޓާއި އޭގެ ތައްޔާރީ ބައްދަލުވުންތަކުގައި ބައިވެރިވެ ވަޑައިގަންނަވާނެ ކަމަށެވެ.
މި ބައްދަލުވުންތަކުގައި އިސްލާމީ އުއްމަތަށް މިހާރު ކުރިމަތިވެފައިވާ ގޮންޖެހުންތަކަށް ހައްލު ހޯދުމަށް އަރަބި އަދި އިސްލާމީ ގައުމުތަކާއެކު މަޝްވަރާކުރައްވާނެ ކަމަށް ވަޒީރު ވިދާޅުވެފައިވެއެވެ.
އަދި ޣައްޒާއަށް ކުރިމަތިވެފައިވާ ހިތްދަތިކަން ފިލުވައިދީ، އިސްރާއީލު ޖަވާބުދާރީ ކުރުވުމަށް އެންމެން އެކުގައި މަސައްކަތްކުރަން ޖެހޭ ކަމަށާއި، މިހާރު ކުރިއަށްދާ އަނިޔާވެރި ހަނގުރާމައާއި ޖަރީމާގެ އަމަލުތައް ހުއްޓާލަންޖެހޭ ކަމަށްވެސް ވަޒީރު ފާހަގަކުރައްވާފައިވެއެވެ.
