މާލޭގައި ހުންނަ ސެލޫނެއްގެ ތެރޭގައި ހަށިވިއްކި މައްސަލައެއްގައި ފަސް މީހަކު ހައްޔަރުކޮށްފިއެވެ.
ހެންވޭރުގައި ހުންނަ ސަރާ ސެލޫން އެންޑް ސްޕާގައި ހަށިވިއްކާ ކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާ ގުޅިގެން މި ނޮވެމްބަރު މަހުގެ 5 ވަނަ ދުވަހު ހިންގި މި އޮޕަރޭޝަނުގައި ހައްޔަރު ކުރީ ދިވެހި ފިރިހެނަކާއި ތައިލޭންޑްގެ ހަތަރު އަންހެނުންނެވެ.
މި މައްސަލައާ ގުޅިގެން ހައްޔަރުކޮށްފައިވަނީ ގއ. ކަނޑުހުޅުދޫ / ޕާކީޒާ، މުޙައްމަދު ޢިމްރާން (42އ)، ސަލިނީ ޔަމްޑީ (30އ)، ޗަޔަނިޓް ޕިލާ (30އ)، ވިލައިޕޯން ކޮޓްވޮންގް (24އ) އަދި ތިޕްސުދާ ސަންގްހަމް (33އ) އެވެ.
މި ފަސް މީހުންގެ ބަންދާމެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން ތައިލެންްޑް އެކަކު ފިޔަވައި ދެން ތިބި މީހުންގެ ބަންދަށް ޖެހީ ހަތް ދުވަހެވެ. އަދި ތައިލެންޑްގެ އެއް އަންހެން މީހާގެ ބަންދަށް ޖެހީ 15 ދުވަހެވެ.
މާލޭގެ މަސާޖް ޕާލާތަކުގައި ހަށިވިއްކާ މައްސަލަތައް މީގެކުރިން ވެސް ފެންމަތިވެފައިވެއެވެ. އެފަދަ މައްސަލަތަކުގައި ބައެއް މީހުން ހައްޔަރުކޮށްފައިވެއެވެ. މިފަދަ މައްސަލަތަކުގައި ހައްޔަރު ކުރާ ބިދޭސީން ގެންދަނީ ޑީޕޯޓް ކުރަމުންނެވެ.
