ޤައުމީ ޔުނިވަރސިޓީގައި މިއަދު ހެނދުނު ބޭއްވި ރަސްމިއްޔާތެއްގައި މުދައްރިސުން ތަމްރީން ކުރުމަށް ފަށާ ޚާއްސަ ޕްރޮގްރާމެއްގެ ދަށުން، ކިޔަވައިދިނުމުގެ ޝައުގުވެރިކަމުގައި އޭ ލެވެލަށް ކިޔަވަން ފަށާ 135 ދަރިވަރުންނަށް ސްކޮލަރޝިޕްގެ ލިޔުން ހަވާލުކޮށްފިއެވެ.
މިއީ ވޭތުވެދިޔަ 10 އަހަރުގެ ތެރޭގައި އެންމެ ގިނަ މުދައްރިސުން ތަމްރީން ކުރުމަށް ކުރިއަށްގެންދާ ޕްރޮގްރާމެވެ.
ރައީސް ޑރ. މުހައްމަދު މުއިއްޒު އަދި އެޑިޔުކޭޝަން މިނިސްޓަރ ޑރ. އިސްމާއިލް ޝަފީއުގެ އިތުރުން އެހެން މިނިސްޓަރުންނާއި ދައުލަތުގެ އިސްވެރިން ބައިވެރިވެވަޑައިގެންނެވި މި ރަސްމިއްޔާތުގައި، ކޮންމެ ސްކޫލަކުން އެއް ދަރިވަރަކަށް ސްކޮލަރޝިޕްގެ ލިޔުން ހަވާލުކުރެއްވީ ރައީސް މުއިއްޒެވެ.
މި ޕްރޮގްރާމްގެ ދަށުން، ގްރޭޑް 11 ގައި އޭލެވެލް ކިޔަވަމުން މުދައްރިސްކަމަށް ޝައުގުވެރިވާ ދަރިވަރުން، އޭލެވެލް ނިންމުމާއެކު ޓީޗިންގ ފައުންޑޭޝަން ފުރިހަމަކުރުމަށްފަހު ޓީޗިންގ ޑިގްރީ ޕްރޮގްރާމްގައި ބައިވެރިވާނެއެވެ. އަދި މި ޕްރޮގްރާމްގައި ބައިވެރިވާ ކޮންމެ ދަރިވަރަކަށް މަހަކު 1,500 ރުފިޔާ ދިނުމަށް އެޑިޔުކޭޝަން މިނިސްޓްރީން ވަނީ ނިންމާފައެވެ. ކުރިން އެޑިޔުކޭޝަން މިނިސްޓަރު ފާހަގަކުރެއްވި ގޮތުގައި ރާއްޖޭގެ ސްކޫލުތަކަށް އިތުރު 2000 އެއްހާ މުދައްރިސުން ބޭނުންވެއެވެ.
