ނިމިދިޔަ ރިޔާސީ އިންތިޚާބުގެ ދެވަނަ ބުރުގެ ވޯޓު ކުޑަތަންވެފައިވަނިކޮށް، ދިވެހި ނޫހެއްގެ ޑޮކިއުމެންޓަރީއަކަށް ރައީސް މުޢިއްޒުގެ ދޮންމަންމާފުޅު ދެއްވި މައުލޫމާތުތަކުގައި އެމަނިކުފާނުގެ އިސްތަށިފުޅުގައި އެޅުވި އިލްޒާމްތައް މިއަދު ރައީސް މުޢިއްޒު ދޮގުކުރައްވައިފިއެވެ.
ދިވެހިރާއްޖޭގެ ޤައުމީ ތަރައްޤީގެ 20 އަހަރުގެ މާސްޓަރޕްލޭންގެ މަޝްވަރާ ބައްދަލުވުން ނިންމަވާލެއްވުމަށްފަހު، ސޯޝަލް ސެންޓަރުން ނުކުމެވަޑައިގެން ނޫސްވެރިންނާ ބައްދަލުކުރެއްވި އިރު، "މިހާރު" ނޫހުން އެ ޑޮކިއުމެންޓަރީގެ ތުހުމަތާ ގުޅޭގޮތުން ކުރެއްވި ސުވާލަށް ރައީސް ޖަވާބު ދެއްވިއެވެ.
މީސްމީޑިއާގައި ދައުރުވަމުންދާ ވީޑިއޯގައި ރައީސް ވިދާޅުވެފައިވަނީ ދޮންމަންމާފުޅާމެދު ކަންކުރެއްވީ ރަނގަޅަށް ކަމަށާއި، ބައްޕާފުޅުގެ މުދާ ބެހުމުގައި ވެސް ޢަމަލުކުރެއްވީ ދޮންމަންމާފުޅު ބޭނުންވި ގޮތަށް ކަމަށެވެ. އެގޮތުން ފެމިލީ ކޯޓުން ތަރިކަ މުދާ ބެހިއިރު، ބައްޕާފުޅުގެ ހުރިހާ މުދަލަކާއި ފައިސާއެއް، އޭގެ ތެރޭގައި ކޮލަމްބޯގައި ހުރި ދެ ގެއަކާއި ކޭންޑީގައި ހުރި ގެސްޓް ހައުސް ވެސް ދެއްވީ ދޮންމަންމާފުޅަށް ކަމަށް ރައީސް ވިދާޅުވެފައިވެއެވެ.
އަޅުގަނޑު ބައްޕަ ނިޔާވީމަ ތަރިކަ ބެހުމުގައި އޮންނަ އުސޫލުން ކޯޓަށް ގޮސްގެން ހުރިހާ ކަމެއް އެ އޮތީ ނިމިފައި، ބައްޕަގެ ގޯތިތައް، ބިންތައް ހުރި ލަންކާގައި، ކޮލަމްބޯ ގައި ދެ ބިން، ކެންޑީގައި އެއް ބިން، ތިން ގޯތި އިމާރާތް ހަދާފަ، އެތަނުން ދެ ތަނުގައި ގެސްޓްހައުސް ހަދާފަ ވިޔަފާރިކުރާ ގޮތަށް، އާަމްދަނީ ހޯދާ ގޮތަށް، އެއް ތަނަކީ ދިރިއުޅެން ހަދާފައި ހުރިތަނެއް، ތިން އިމާރާތް، ތިން ބިން އޮތް، އަޅުގަނޑު ނިންމީ އެ ތިން ގޯތި، އިމާރާތާއި އެއްގޮށް، ވިޔަފާރިއާއި އެއްކޮށް ދޮންމަންމައަށް ދޭން ހިލޭ، އެއްވެސް ބަދަލަކާނުލާ.
ރައީސް ވިދާޅުވިއެވެ.
ރައީސް އިތުރަށް ވިދާޅުވެފައިވަނީ ބައްޕާފުޅުގެ އެންމެހައި މުދަލާއި ފައިސާ ދޮންމަންމާފުޅަށް ދެއްވުމުން، ދޮންމަންމާފުޅު އިސްނަންގަވައި، ދީނީގޮތުން ހުވަފަތް އަނބިމީހާއަށް ލިބޭ ބައިކުޅަބައި ރައީސަށް ދޫކޮށްލެއްވި ކަމަށެވެ. އަދި ޒާތީ ވާހަކަ ދެއްކުމަކީ އެމަނިކުފާނުގެ މިޒާޖުގައި ހުންނަ ކަމަކަށް ނުވާތީ، މިވާހަކަ މިހާތަނަށް ވެސް ދައްކަވަން ބޭނުންފުޅުނުވި ނަމަވެސް، އެމަނިކުފާނުގެ އަގު ވައްޓާލުމަށް ސިޔާސީ ވިސްނުމެއްގައި މިކަން ކުރާތީ، ނޫސްވެރިން ސުވާލުކުރެއްވުމުން ޖަވާބު ދެއްވަން ނިންމެވި ކަމަށް ރައީސް ވިދާޅުވެފައިވެއެވެ.
އެހެންވީމަ ދޮންމަންމަ ވިދާޅުވީ، ދީނީ ގޮތުން ހުވަފަތް އަތްބެއް ވީމަ އޮންނަ ބައިކުޅަބައި، އެބައި އެއްކޮށް އަޅުގަނޑަށް ދޫކޮށްލާނަމޭ، އެހެންވީމަ އެއީ ނިންމި ގޮތަކީ އެ ގޮތައް ނިންމައިގެން ތަރިކަ ބަހާ ނިންމާފައި އެއޮތީ، އެއީ އެކަމުގެ ހަގީގަތަކީ.
ރައީސް ވިދާޅުވިއެވެ.
