ފަލަސްތީނުގެ މައްސަލައިގައި ހާރިޖީ މިޝަންތަކުގެ ސަރަހައްދުގައި އިހުތިޖާޖުކުރުމުގެ މައްސަލައެއްގައި، ޝާދިޔާ އަހުމަދާއި ޑރ. ޝަޒްރާ އިބްރާހީމްގެ މައްޗަށް ޕްރޮސެކިއުޓަރ ޖެނެރަލްގެ އޮފީހުން ދައުވާ އުފުލައިފިއެވެ.
މި މައްސަލައިގައި އެ ދެ މީހުން މިދިޔަ އޮގަސްޓް 28 ގައި ހައްޔަރުކޮށް، ސެޕްޓެމްބަރު 5 ގައި ބަންދުން ދޫކޮށްލާފައިވެއެވެ. އެ ދެ މީހުންގެ މައްޗަށް އުފުލާފައިވަނީ ދެ ދައުވާއެކެވެ. އޭގެ ތެރޭގައި ދައުލަތުގެ މަސައްކަތްތަކަށް ހުރަސްއެޅުމުގެ ކުށުގެ ދައުވާއާއި، އާންމު ތަނެއްގައި އެކަށީގެން ނުވާ ވަރަށް އަޑުގަދަކުރުމުގެ ކުށުގެ ދައުވާ ހިމެނެއެވެ. މި ދެ ކުށުގެ އަސާސީ އަދަބަކީ އެންމެ ދިގު މުއްދަތެއްގެ ގޮތުގައި 4 މަހާއި 24 ދުވަހާއި، 1 މަހާއި 6 ދުވަހުގެ ޖަލު ޙުކުމެވެ.
ފުލުހުން ބުނާ ގޮތުގައި އެ ދެ މީހުން ޑިޕްލޮމެޓިކް މިޝަންތަކުގެ މަސައްކަތަށް ހުރަސްއަޅައި، ވަކި ސަފީރަކަށް އުނދަގޫކުރުމުގެ އަމަލުތަކެއް ހިންގައި، އަދި ސުލްހަވެރިކަމާއެކު އެ ސަރަހައްދުން ދިއުމަށް އެންގުމުން އެކަމަށް އިންކާރުކޮށްފައިވެއެވެ. އަދި އަޑުގަދަކުރާ ބޭނުންކޮށްގެން ހަޅޭއްލަވައި، ބޭއަދަބީ ބަހުރުވައިން މުއާމަލާތްކުރުމަށްފަހު، ތަކުރާރުކޮށް ނަސޭހަތްދިނުމުންވެސް އެކަން ހުއްޓާނުލުމުން ހައްޔަރުކުރެވުނީއެވެ.
ނަމަވެސް ޝާދިޔާ މި މައްސަލަ ހައިކޯޓަށް ހުށަހެޅުމުން، އޭނާ ގާނޫނާ ހިލާފަށް ބަންދުކޮށްފައިވާކަމަށް ކަނޑައަޅައި، އޭނާއާ އެއްކޮޅަށް ހައިކޯޓުން ނިންމާފައިވެއެވެ. ރާއްޖޭގެ ގާނޫނުތަކުގެ ދަށުން ޑިޕްލޮމެޓިކް މިޝަންތައް ހުންނަ ސަރަހައްދުތަކަށް އެއްވުމަކީ މަނާކަމެކެވެ.
