މިދިޔަ ބުރާސްފަތި ދުވަހު ވައިގެ މަގުން ރާއްޖެ އެތެރެކުރަން އުޅުނު 5.9 ކިލޯގެ މަސްތުވާތަކެތި އަތުލައިގަނެފައިވާކަމަށް ކަސްޓަމްސްއިން ބުނެފިއެވެ. ކަސްޓަމްސް ސާވިސްއިން މިއަދު "އެކްސް" ގައި ހިއްސާކުރި މަޢުލޫމާތުގައިވާ ގޮތުން މި މަސްތުވާތަކެތީގެ ތެރޭގައި ހިމެނެނީ 5520 ގްރާމްގެ ކެނެބިސް އާއި 416 ގްރާމްގެ ކެތިނޯންއެވެ. މި ތަކެތި އަތުލައިގަނެފައިވަނީ ވެލާނާ އިންޓަނޭޝަނަލް އެއާޕޯޓުންނެވެ.
މީގެ އިތުރުން މިދިޔަ މަހުގައިވެސް ތިން ފަހަރެއްގެ މަތިން މަސްތުވާތަކެތި އަތުލައިގަނެފައިވެއެވެ. މިގޮތުން މިދިޔަ މަހުގެ 5 ވަނަ ދުވަހު ވެލާނާ އިންޓަނޭޝަނަލް އެއާޕޯޓުން 2.440 ކިލޯގެ ކޮކެއިން އަތުލައިގަތެވެ. އަދި 7 ވަނަ ދުވަހު ޕޯސްޓް މެދުވެރިކޮށް ރާއްޖެ އެތެރެކުރަން އުޅުނު 1.040 ކިލޯގެ ހެރޮއިން އަތުލައިގަތެވެ.
އޭގެ އިތުރުން 15 ވަނަ ދުވަހު ވެލާނާ އިންޓަނޭޝަނަލް އެއާޕޯޓުން 2.05 ކިލޯގެ ހެރޮއިން އަތުލައިގަނެފައިވެއެވެ.
