އާދައިގެ ކަރުދާހުގައި ޕްރިންޓުކޮށްފައި ހުންނަ 500ރ. ގެ ވަގު ނޫޓުތަކެއް ދައުރުވާތީ އެކަމަށް ސަމާލުވާން ފުލުހުން އެދިއްޖެއެވެ.
ފުލުހުން ބުނީ ފަހަކަށް އައިސް އާދައިގެ ކަރުދާހަށް ޕްރިންޓުކޮށްފައި ހުންނަ 500 ރުފިޔާގެ ސައްހަ ނޫން ނޫޓުތަކެއް ދައުރުވަމުންދާ ކަމަށެވެ.
އެހެންވެ، ވިޔަފާރީގެ މުއާމަލާތްތަކާއި ފައިސާގެ މުއާމަލާތްތައް ކުރުމުގައި ދިވެހި ރުފިޔާގެ ތަފާތު ނޫޓުތަކުގައި ހުންނަ ސެކިއުރިޓީ ފީޗާސްތައް ހުރިތޯ ބެލުމަށާއި ފައިސާ ޕްރިންޓުކޮށްފައިވާ ކަރުދާހުގެ ކޮލިޓީ ބެލުން ފަދަ ކަންކަމަށް ސަމާލުކަން ދިނުމަށް ފުލުހުން ވަނީ އެދިފައެވެ.
އެފަދަ މައްސަލައެއް ދިމާވެއްޖެނަމަ ލަސްނުކޮށް ފުލުހުންނަށް ރިޕޯޓުކުރުމަށް ފުލުހުން އެދެއެވެ.
ވަގު ނޫޓު ބޭނުންކޮށްގެން ވިޔަފާރި ކުރުމުގެ ތުހުމަތުގައި މާލެއިން ހައްޔަރު ކޮށްފައިވަނީ ތ. ތިމަރަފުށީ ސަލްވާ، އައިޝަތު ޝިޒްނީ އާއި ސ. ހިތަދޫ އަތަމާވިލާ، މައުޒޫ މުހައްމަދެވެ.
އެ ދެ މީހުން ބަލައި ފާސްކޮށް، 500ރ. ގެ 24 ވަގު ނޫޓު ފެނިފައިވެއެވެ. އަދި އެ ދެ މީހުންގެ ބަންދާމެދު ގޮތެއް ނިންމަން ކްރިމިނަލް ކޯޓަށް ހާޒިރު ކުރުމުން ވަނީ 30 ދުވަހަށް ބަންދު ކުރުމަށް އަމުރުކޮށްފައެވެ.
