ފަލަސްތީނުގެ ރައްޔިތުންނަށް އެހީވުމަށް ބޭއްވި 'ފަލަސްތީނާ އެކު ދިވެހިން' ޓެލެތޯނުން އެއްކުރެވުނު 19 މިލިއަން ރުފިޔާއަށްވުރެ ގިނަ ފައިސާ އދ.ގެ އަންރާއަށް ރައްދުކޮށްފިއެވެ.
ރައީސް މުޙައްމަދު މުޢިއްޒުގެ އިސްނެންގެވުމުގެ ދަށުން، ޕަބްލިކް ސަރވިސް މީޑިއާ (ޕީއެސްއެމް) އިން މި އަހަރުގެ ޖޫން 12 ވަނަ ދުވަހު ބޭއްވި މި ޓެލެތޯނަށް، އަމިއްލަ ކުންފުނިތަކާއި ސަރުކާރުގެ މުއައްސަސާތަކުގެ އިތުރުން އާންމު ރައްޔިތުން ވެސް ފައިސާގެ އެހީތެރިކަން ފޯރުކޮށްދިނެވެ.
މީޑިއާތަކުގައި މިހާރު އާންމުވެފައިވާ، މި މުއާމަލާތާއި ގުޅުންހުރި ލިޔެކިޔުންތަކުން އެނގޭ ގޮތުގައި މޯލްޑިވްސް މަނިޓަރީ އޮތޯރިޓީ (އެމްއެމްއޭ) މެދުވެރިކޮށް މިނިސްޓްރީ އޮފް ފިނޭންސްއިން ވަނީ އަންރާއަށް، ޖުމްލަ 19.3 މިލިއަން ރުފިޔާ ޑޮލަރަށް ބަދަލުކޮށް، ފޮނުވާފައެވެ.
މި ފައިސާ ޕީއެސްއެމްއިން ސަރުކާރާ ހަވާލުކުރީ ޖުލައި މަހުގައެވެ.
މި ޕްރޮގްރާމްގެ ހިސާބުތައް ދެފުށް ފެންނަ ގޮތަށް ބެލެހެއްޓުމަށްޓަކައި، ކްރޯ މޯލްޑިވްސްއިން ވަނީ އޮޑިޓެއް ކުރިއަށް ގެންގޮސްފައެވެ.
