ރާއްޖެއަށް ކަނޑު މަގުން ވަގަށް އެތެރެކުރަން އުޅުނު ގިނަ އަދަދެއްގެ ސިނގިރޭޓް ކާޓަންތަކެއް ކަސްޓަމްސް އިން މިދިޔަ ހުކުރު ދުވަހުގެ ރޭ ހިފަހައްޓައިފިއެވެ. މި ސިނގިރޭޓްތައް ފެނުނީ ތިލަފުށީގައި އޮތް ހޯކްސް ކުންފުނީގެ ބޯޓަކުންނެވެ.
ހޯމް މިނިސްޓަރު އަލީ އިހުސާން ވިދާޅުވެފައިވަނީ، މިވަގުތު ބަލައި ފާސްކުރުމުގެ މަސައްކަތް ދަނީ ކުރަމުންކަމަށާއި، އެހެންނަމަވެސް މިހާތަނަށް ލިބިފައިވާ މައުލޫމާތުތަކަށް ބަލާއިރު ގާތްގަނޑަކަށް 2،000 ކާޓަން ހުރި ކަމަށް ލަފާކުރެވޭ ކަމަށެވެ.
މި މައްސަލައިގައި ބޯޓުގެ ކްރޫ މެންބަރުންގެ ބަޔާން ނެގުމުން، އެމީހުން މި މައްސަލައިގެ ޒިންމާ އަޅުވަނީ ބޯޓުގެ ކެޕްޓަންގެ ބޮލުގައެވެ. ނަމަވެސް ހޯކްސް ކުންފުނީގެ އިސް އޮފިޝަލަކު ވިދާޅުވެފައިވަނީ މިއީ ކުންފުންޏާ އެއްވެސް ގުޅުމެއް ހުރި ކަމެއް ނޫން ކަމަށެވެ. އަދި މިއީ ކުންފުނީގެ މުވައްޒަފުންތަކަކާއި ބޭރުގެ ބަޔަކު ގުޅިގެން ހިންގާފައިވާ ކަމެއްކަން އެނގުނީ ފުލުހުން ކޯޓު އަމުރަކާއެކު ބަލައި ފާސްކުރަން ދިއުމުން ކަމަށެވެ.
މި މައްސަލައާ ގުޅިގެން ކުންފުނީގެ އިންޓަނަލް އިންވެސްޓިގޭޝަނެއް ކުރިއަށްދާ ކަމަށާއި، ދައުލަތުގެ ކަމާބެހޭ އިދާރާތަކަށް ފުރިހަމަ އެއްބާރުލުން ދޭނެ ކަމަށާއި އެއްވެސް ކަމެއް ނުފޮރުވާނެ ކަމަށް ހޯކްސްގެ އޮފިޝަލް ވިދާޅުވެފައިވެއެވެ.
