ސަމޯއާގައި ބޭއްވުނު ކޮމަންވެލްތު ހެޑްސް އޮފް ގަވަމަންޓް މީޓިންގގެ ތެރެއިން ބޭއްވުނު ރަސްމީ ޙަފްލާއެއްގައި، ދިވެހިރާއްޖޭގެ ނައިބު ރައީސް ޙުސައިން މުޙައްމަދު ލަޠީފް އިނގިރޭސި ރަސްގެފާނު ޗާލްސް 3 ވަނައަށް ރާއްޖެ ވަޑައިގަތުމުގެ ދަޢުވަތު އަރުވައިފިއެވެ.
މި ބައްދަލުކުރެއްވުމުގައި ނެންގެވި ފޮޓޯއެއް ސޯޝަލް މީޑިއާގައި ހިއްސާކުރައްވަމުން ނައިބު ރައީސް ވިދާޅުވެފައިވަނީ މިއީ ލިބުނު ވަރަށް ބޮޑު ޝަރަފެއް ކަމަށެވެ. އިނގިރޭސި ޝާހީ އާއިލާގެ ފަރާތުން ދިވެހިރާއްޖެއަށް މިހާތަނަށް ކުރައްވާފައިވަނީ އެންމެ ދަތުރުފުޅެކެވެ. އެއީ 1972 ވަނަ އަހަރު ރާނީ އެލިޒަބަތު ދެވަނަ ކުރެއްވި ދަތުރުފުޅެވެ.
އެހެންކަމުން ރަސްގެފާނު ޗާލްސް 3 ވަނަ ރާއްޖެއަށް ވަޑައިގަތުމަކީ ތާރީޚީ ގޮތުން ވަރަށް މުހިންމު ހާދިސާއަކަށް ވެގެންދާނެއެވެ. އަދި މިފަދަ ދަތުރުފުޅަކުން ދެ ޤައުމުގެ ދެމެދުގައި އޮތް އެކުވެރިކަމާއި އިޤްތިޞާދީ އަދި ސަޤާފީ ގުޅުން އިތުރަށް ހަރުދަނާވެގެންދާނެ ކަމަށް ބެލެވެއެވެ.
ނަމަވެސް މި ދަޢުވަތާ ގުޅިގެން ރަސްގެފާނުގެ ދަތުރުފުޅު ކުރިއަށް ގެންދަވާނެ ތާރީޚެއް މިހާތަނަށް ހާމަކުރައްވާފައެއް ނުވެއެވެ.
