މައްސަލަތައް މުރާޖަޢާކުރުމަށް އެ އޮފީހުން ހުޅުވާލި ފުރުސަތުގެ ދަށުން 539 ހުށަހެޅުމެއް ލިބިފައިވާކަން ޕްރޮސެކިއުޓަރ ޖެނެރަލް އައްބާސް ޝަރީފް ހާމަކުރައްވައިފިއެވެ.
މި ހުށަހެޅުންތައް ލިބިފައިވަނީ ކޯޓުތަކުގައި ހިނގަމުންދާ ދަޢުވާތަކާއި އިސްތިއުނާފު މަރުޙަލާގައިވާ މައްސަލަތަކުގައި ހައްޔަރުގައި ނުވަތަ ބަންދުގައި ތިބި ފަރާތްތަކުގެ ބަންދު މުރާޖަޢާކުރުމަށް، 1 އޮކްޓޯބަރު 2024 އިން ފެށިގެން 20 ދުވަހުގެ މުއްދަތަށް ހުޅުވާލި ފުރުސަތުގެ ތެރެއިންނެވެ.
ބައެއް މީޑިއާތަކަށް މައުލޫމާތު ދެއްވަމުން އައްބާސް ޝަރީފް ވިދާޅުވި ގޮތުގައި މި ހުށަހެޅުންތައް މިހާރު ދަނީ މުރާޖަޢާކުރަމުންނެވެ. މިފަދަ މައްސަލަތައް މުރާޖަޢާކުރުމަކީ ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީގެ 223 ވަނަ މާއްދާގެ (ބ) އާއި (އ) ގެ ދަށުން ޕްރޮސެކިއުޓަރ ޖެނެރަލްގެ މަސްއޫލިއްޔަތެކެވެ. މި މަސްއޫލިއްޔަތު އަދާކުރުމަށް އެހީތެރިވުމަށްޓަކައި، ޕްރޮސެކިއުޓަރ ޖެނެރަލްގެ އޮފީހުގައި ވަނީ ޚާއްޞަ މުރާޖަޢާ ކޮމިޓީއެއް އެކުލަވާލާފައެވެ.
މި ކޮމިޓީގެ މަސްއޫލިއްޔަތަކީ ހުށަހެޅިފައިވާ މައްސަލަތައް ޤާނޫނުއަސާސީއާއި، ޤާނޫނުތަކާއި، ކަމާގުޅޭ ގަވާއިދުތަކުގެ އަލީގައި ދިރާސާކޮށް، އަޅަންޖެހޭ ފިޔަވަޅުތަކާ ބެހޭގޮތުން ޕްރޮސެކިއުޓަރ ޖެނެރަލްއަށް ލަފާ އެރުވުމެވެ. އަދި މި ކޮމިޓީގެ މަސައްކަތްތައް ކުރިއަށްދާނީ ސީދާ ޕްރޮސެކިއުޓަރ ޖެނެރަލްގެ ބެއްލެވުމުގެ ދަށުންނެވެ.
