ތުރުކީވިލާތުގެ އަންކާރާ ކައިރީގައި ހުންނަ ޓާކީގެ އެއަރޯސްޕޭސް އަދި ޑިފެންސް ކުންފުނި، ޓާކިޝް އެއަރޯސްޕޭސް އިންޑަސްޓްރީސް (ޓުސާސް) ގެ މައި އޮފީހަށް ދެވުނު ހަމަލާއެއްގައި މަދުވެގެން 5 މީހުން މަރުވެ، 22 މީހުން ޒަޚަމްވެއްޖެކަމަށް ޓާކީގެ އިންޓީރިއަރ މިނިސްޓަރު ވިދާޅުވެއްޖެއެވެ.
ތުރުކީ ދައުލަތުން ހިންގާ މި ކުންފުނީގެ މައި އޮފީހަށް ދެވުނު ހަމަލާގައި "2 ޓެރަރިސްޓުން ނައްތާލެވުނު" ކަމަށް އިންޓީރިއަރ މިނިސްޓަރ އަލީ ޔެރްލިކަޔާ ބުދަ ދުވަހު އެކްސްގައި ލިޔުއްވިއެވެ. "ހިތާމައާއެކު، މި ހަމަލާގައި 5 ޝަހީދުން އަދި 22 ޒަޚަމްވި މީހުން ތިބި. ޒަޚަމްވި މީހުންގެ ތެރެއިން 3 މީހުން ވަނީ ހޮސްޕިޓަލުން ދޫކޮށްލެވިފަ، 19 މީހުން ފަރުވާ ދެމުން ގެންދޭ،" އޭނާ ވިދާޅުވިއެވެ.
ހަމަލާ ދިން ވަގުތު ރަޝިޔާގެ ވްލަޑިމިރ ޕުޓިންއާއެކު މަޝްވަރާތައް ކުރިއަށް ގެންދެވި ޕްރެޒިޑެންޓް ރެސެޕް ޓައިޔިޕް އެރްދޯއާން، މިއީ "ނުރައްކާތެރި ޓެރަރިސްޓް ހަމަލާއެއް" ކަމަށް ވިދާޅުވެ ކުށްވެރި ކުރެއްވިއެވެ.
ލޯކަލް މީޑިއާއިން ދެއްކި ހަމަލާ ދިން ވަގުތުގެ މަންޒަރުތަކުގައި، ތުރުކީގެ ގަޑިން 3:30 ގައި (12:30 ޖީ.އެމް.ޓީ) އަންކާރާއިން އުތުރަށް 40 ކިލޯމީޓަރު (25 މޭލު) ދުރުގައި އޮންނަ ކަހްރަމަންކަޒަންގެ ސައިޓުގައި ބޮޑެތި ދުމުގެ ވިލާތަކާއި ބޮޑު އަލިފާނެއް ފެންނަން ހުއްޓެވެ. ލޯކަލް މީޑިއާގެ ރިޕޯޓުތަކުން ބުނާ ގޮތުގައި، ސައިޓުގައި ބޮޑު އަޑެއް އިވި، އޭގެ ފަހުން ބަޑިޔަށް ޖެހިއެވެ.
ބްރޯޑްކާސްޓަރުން ދެއްކި ހަމަލާގެ ސެކިއުރިޓީ ކެމެރާ މަންޒަރުތަކުގައި، ބެކްޕެކެއް އަޅައިގެން، އެސޯލްޓް ރައިފަލެއް ހިފައިގެން ހުރި އާންމު ހެދުމެއްގައި ހުރި މީހަކު ފެނެއެވެ. މި މަންޒަރުތަކުގައި އަންހެނަކު ހަތިޔާރެއް ހިފައިގެން ހުރިތަންވެސް ފެނެއެވެ.
އަންކާރާއިން ރިޕޯޓު ކުރާ އަލް ޖަޒީރާގެ ސިނެމް ކޮސެއޯގްލޫ ބުނާ ގޮތުގައި، ކަހްރަމަންކަޒަންގެ ޓުސާސް ކެމްޕަހުގައި 15،000 މީހުން މަސައްކަތްކުރެއެވެ.
"އެތެރެއަށް ވަދެގަތް ހަމަލާދޭ މީހުން މަސައްކަތްތެރިންގެ ތެރެއިން ބަޔަކު ހިފަހައްޓާފައި ތިބިކަމުގެ ވާހަކަތަކެއް އެބަހުރި، އެކަމަކު އިތުރު ތަފްސީލެއް ނެތް،" އޭނާ ބުންޏެވެ.
"ފެންނަ ގޮތުގައި، ހަމަލާދިން މީހުންނަށް ޢިމާރާތާއި، ވަދެވޭ ދޮރުތަކުގެ މަޢުލޫމާތު އެނގިފައި ހުރި،" ކޮސެއޯގްލޫ ބުންޏެވެ. އަދި ހަމަލާދިން މީހުން މުވައްޒަފުންގެ ދޮރާ ދިމާއަށް ދިޔަކަން އިތުރަށް ބަޔާންކޮށްދިނެވެ. "ގިނަ ތަޖުރިބާކާރުން މިހާރު ބުނަނީ މިއީ ސްޓްރެޓެޖިކްކޮށް ރާވައިގެން ދިން ޓެރަރިސްޓް ހަމަލާއެއްކަމަށް."
އެއްވެސް ފަރާތަކުން އަދި މިހަމަލާގެ ޒިންމާ ނަގާފައެއް ނުވެއެވެ. ނަމަވެސް ޖަސްޓިސް މިނިސްޓަރު ވިދާޅުވި ގޮތުގައި މިކަމުގެ ތަޙުޤީޤު މިހާރުވަނީ ފެށިފައެވެ. ޔެރްލިކަޔާ ވިދާޅުވި ގޮތުގައި މި ހަމަލާ "ގުޅިފައި އޮތް ކަމަށް ބެލެވެނީ" ސަރުކާރާ ދެކޮޅަށް އެތައް ދުވަހެއް ވަންދެން ހަގުރާމަކުރަމުންދާ، މަނާކުރެވިފައިވާ ކަރްދިސްތާން ވާރކަރސް ޕާޓީ (ޕީ.ކޭ.ކޭ) އާ ކަމަށެވެ.
