މަޖީދިއްޔާ ސްކޫލުގެ ބެލެނިވެރިންގެ އަތުން އޭސީ ހަރުކުރުމަށް ފައިސާ ނެގިކަމަށް ބުނެ އުފެދިފައިވާ މައްސަލައިގައި، އެކަން ދޮގުކޮށް ތަޢުލީމީ ވުޒާރާއިން ބަޔާނެއް ނެރެފިއެވެ.
މި މައްސަލަ ފެށުނީ މީހަކު މީސްމީޑިއާގައި ކުރި ޕޯސްޓަކާ ގުޅިގެންނެވެ. އެ ޕޯސްޓުގައި ބުނެފައިވަނީ "ކޫލް ސްކޫލް" ޕްރޮޖެކްޓްގެ ދަށުން މަޖީދިއްޔާ ސްކޫލުގެ ކްލާސްރޫމުތަކުގައި އޭސީ ހަރުކުރުމަށް ކޮންމެ ބެލެނިވެރިއެއްގެ އަތުން 297 ރުފިޔާ ނަގަމުންދާ ކަމަށެވެ. އަދި މި ފައިސާ ދެއްކުމުގެ ސުންގަޑިއަކީ ނޮވެމްބަރ 1 ކަމަށާއި، އެ މުއްދަތަށް ފައިސާ ނުދައްކާ ކުދިންގެ ނަން ސްކޫލުގެ ނޯޓިސް ބޯޑުގައި ޝާއިޢުކުރާނެ ކަމަށް ބުނެފައިވެއެވެ.
މި ޕޯސްޓާ ގުޅިގެން ގިނަ ބައެއްގެ ނުރުހުން ސަރުކާރަށާއި ތަޢުލީމީ ވުޒާރާއަށް އަމާޒުވަމުން ދިޔައެވެ. ނަމަވެސް މި މައްސަލައާ ގުޅޭގޮތުން ބައެއް މީޑިއާތަކަށް މަޢުލޫމާތު ދެމުން، އެޑިޔުކޭޝަން މިނިސްޓްރީން ވަނީ މި މަޢުލޫމާތު ދޮގު ކަމަށް ބުނެފައެވެ. މިނިސްޓްރީގެ ބަހުން، މަޖީދިއްޔާ ސްކޫލުން އެފަދަ އެއްވެސް އެންގުމެއް އަންގާފައި ނުވާކަމަށް ސްކޫލުން މިނިސްޓްރީއަށް އަންގާފައިވާ ކަމަށް ބުނެފައިވެއެވެ.
ސަރުކާރުގެ "ކޫލް ސްކޫލް" ޕްރޮޖެކްޓްގެ ދަށުން، ކުރިއަށް އޮތް ދެ އަހަރު ދުވަހުގެ ތެރޭގައި ރާއްޖޭގެ ހުރިހާ ސަރުކާރު ސްކޫލުތަކެއްގައި އޭސީ ހަރުކުރުމަށް ވަނީ ރޭވިފައެވެ. މި މައްސަލައިގައި ހަޤީޤަތަކީ ކޮބައިކަން އަދި ސާފުވެފައި ނުވިނަމަވެސް، މިނިސްޓްރީން ދޭހަވާގޮތުން މި މައްސަލައަކީ އޮޅުމަކުން އުފެދިފައިވާ ކަމެއް ކަމަށް ބެލެވެއެވެ.
