އެމްކިއުއޭއިން ގަބޫލުނުކުރާ ޕީއެޗްޑީ ސެޓްފިކެޓް ބަލައިގަތުމަށް ހައިކޯޓުން ނިންމި ނިންމުމާ ގުޅޭ މައްސަލައެއް އެމްކިއުއޭއިން ސުޕްރީމް ކޯޓަށް މައްސަލަ ހުށަހަޅައިފިއެވެ.
މި މައްސަލައިގެ ފެށުމަކީ 2016 ވަނަ އަހަރު، އޭރު އެމްކިއުއޭއިން ފިލިޕީންސްގެ އެލްޑާސްގޭޓް ކޮލެޖުގެ ސަނަދު ލިބޭގޮތަށް ސްރީލަންކާގެ އެއިމްސް ކޮލެޖުން ހިންގި ޕީއެޗްޑީ ކޯހެއް ގަބޫލުކުރާނެކަމަށް އެންގުމާ ގުޅިގެން ގިނަ ބަޔަކު އެ ކޯހުގައި ބައިވެރިވިއެވެ. ނަމަވެސް 2018 ގައި އެމްކިއުއޭއިން އެ ކޯސް ގަބޫލުކުރުން ހުއްޓާލިއެވެ. އެހެންނަމަވެސް އޭރު ކިޔަވަމުންދިޔަ ދަރިވަރުންގެ ސެޓްފިކެޓް ބަލައިގަންނާނެކަމަށް އެމްކިއުއޭއިން އަންގާފައިވެއެވެ.
2021 ގައި އެ ކޯސް ނިންމި ދަރިވަރުން ސެޓްފިކެޓް ވެލިޑޭޓްކުރަން ހުށަހެޅުމުން، އެމްކިއުއޭއިން އެކަމަށް އިންކާރުކުރިއެވެ. މިކަމާ ގުޅިގެން ތިން ދަރިވަރަކު ކޯޓަށް މައްސަލަ ހުށަހެޅިއެވެ. ސިވިލް ކޯޓުން ނިންމީ ސެޓްފިކެޓް ގަބޫލުނުކުރެވޭނެކަމަށެވެ. ނަމަވެސް މި ނިންމުން ހައި ކޯޓުން ބަދަލުކޮށް، އެ ތިން ދަރިވަރުންގެ ސެޓްފިކެޓް ބަލައިގަންނަންޖެހޭނެކަމަށް ނިންމިއެވެ.
މިހާރު އެމްކިއުއޭއިން ވަނީ މި މައްސަލަ ސުޕްރީމް ކޯޓަށް ހުށަހަޅާފައެވެ. އަދި މި މައްސަލަ ބަލައިގަތުމާމެދު ސުޕްރީމް ކޯޓުން އަދި ވަކި ގޮތެއް ނިންމާފައެއް ނުވެއެވެ. އެމްކިއުއޭއިން މި ސެޓްފިކެޓްތައް ބަލައިނުގަތުމަށް ނިންމި ނަމަވެސް، ދައުލަތުން ވަނީ ހައި ކޯޓުގައި މި ސެޓްފިކެޓްތައް ބަލައިގަންނަންޖެހޭނެކަމަށް ބުނެފައެވެ.
ކޮމެންޓު ފޮނުވާ