މިދިޔަ އަންގާރަ ދުވަހު، މޯލްޑިވްސް ކަސްޓަމްސްއިން ރާއްޖެ އައި އިންޑިއާގެ ދެ މަފިރިންގެ އަތުން ގާތްގަނޑަކަށް ދެ މިލިއަން ރުފިޔާގެ މަސްތުވާތަކެތި އަތުލައިގަތެވެ.
މެލޭޝިއާއިން ރާއްޖެ އައި 41 އަހަރުގެ ފިރިހެނަކާއި 38 އަހަރުގެ އަންހެނެއްގެ ލަގެޖުގައި މަސްތުވާތަކެތި ރައްކާކޮށްގެން ގެނެސްފައިވާ ކަމަށް ޝައްކުކުރެވުމާ ގުޅިގެން އެ ދެ މީހުންގެ ލަގެޖް ބަލައި ފާސްކުރުމުން މި ތަކެތި ފެނުނެވެ.
ކަސްޓަމްސްއިން ހާމަކުރި ގޮތުގައި، ފުރަތަމަ މަރުހަލާގެ ތަހުލީލުގައި މި ތަކެތި ހެރޮއިންއަށް ޕޮޒިޓިވް ވެފައިވެއެވެ. މި ތަކެތީގެ ބަރުދަނަކީ ޕެކިންއާއެކު 2.05 ކިލޯ ކަމަށާއި، މަގުމަތީ އަގު ގާތްގަނޑަކަށް 2.05 މިލިއަން ރުފިޔާ ހުންނާނެ ކަމަށް ލަފާކުރެވެއެވެ.
މި މައްސަލަ އިތުރަށް ތަހުގީގު ކުރުމަށްޓަކައި، އަތުލެވުނު މަސްތުވާތަކެއްޗާއި ދެ ފަސިންޖަރުން ފުލުހުންނާ ވަނީ ހަވާލުކުރެވިފައެވެ. ބުދަ ދުވަހު އެ ދެ މީހުން ކްރިމިނަލް ކޯޓަށް ހާޒިރުކުރެވުނު އިރު، ތަރުޖަމާނަކު ހަމަޖެހިފައި ނުވާތީ، ކޯޓުން ވަނީ އެ ދެ މީހުން ތިން ދުވަހަށް ބަންދުކުރުމަށް އަމުރުކޮށްފައެވެ.
