ރާއްޖޭގައި ވޭޕް މަނާ ކުރަން ރައީސް ޑރ. މުހައްމަދު މުއިއްޒު ނިންމެވި ނިންމެވުމަކީ ރަނގަޅު ކަމެއް ކަަމަށް ވިދާޅުވެ، ކުރީގެ ޔޫތު މިނިސްޓަރު އަހުމަދު މަހްލޫފް، އެ ނިންމެވުމަށް މަރުހަބާ ވިދާޅުވެއްޖެއެވެ.
މަހްލޫފް ވިދާޅުވީ މަސްތުވުމާއި ދުންފަތުގެ އިސްތިއުމާލުކުރުމުގެ ވަބާގައި ޖެހިފައިވާ އެތައް ޒުވާނުންނެއް އަދި އެތައް ކުޑަކުދިންނެއް ރާއްޖޭގައި ތިބިކަމީ ހަގީގަތެއް ކަމަށެވެ.އަދި ހާއްސަކޮށް ވޭޕުކުރާ ކުޑަކުދިން އިންތިހާއަށް އިތުރުވާކަން، ސުކޫލުތަކުން ހޯދާ ވޭޕުގެ އަދަދުތަކުން ޔަގީންވާ ކަމަށްވެސް މަހްލޫފް ވިދާޅުވިއެވެ.
"ވޭޕު ކުރުން ހުއްޓުވުމުގެ މަގުސަދުގައި، ވޭޕުކުރަން ބޭނުންކުރާ ސާމާނާއި އޭގެ ވަކިވަކި ބައިތައް އެތެރެކުރުން ހުއްޓުވުމަށް ރައީސުލްޖުމްހޫރިއްޔާ ޑރ. މުއިއްޒު ނިންމެވި ނިންމުމަކީ ރަނގަޅު ކަމެއްކަމަށްދެކި މަރުހަބާ ކިޔަން،". މަހްލޫފް ވިދާޅުވިއެވެ.
ރައީސް މުއިއްޒު އެކްސްގައި ކުރެއްވި ޕޯސްޓެއްގައި ވިދާޅުވެފައިވަނީ ވޭޕްކުރުމަށް ބޭނުންކުރާ ތަކެއްޗާއި އޭގެ ވަކިވަކި ބައިތައް ރާއްޖެއަށް އެތެރެކުރުން 2024 ނޮވެމްބަރު 15 އިން ފެށިގެން މަނާކުރުމަށާއި، އަދި 2024 ޑިސެމްބަރު 15 އިން ފެށިގެން ރާއްޖޭގައި ވޭޕްކުރުމަށް ބޭނުންކުރާ ތަކެތި ބޭނުންކުރުމާއި، ގެންގުޅުމާއި، އުފެއްދުމާއި، ވިއްކުމާއި، އިޝްތިހާރުކުރުމާއި ހިލޭ ބެހުން މަނާކުރުމަށް ކަމާބެހޭ ފަރާތްތަކަށް އަންގަވާފައިވާ ކަމަށެވެ.
ރައީސް މުއިއްޒުގެ ނިންމެވުމާ އެއްގޮތަށް ރާއްޖޭގައި ވޭޕް މަނާކުރުމަށްޓަކައި ގާނޫނުތަކަށް ގެންނަންޖެހޭ އިސްލާހުތައް މި ހަފުތާގެ ތެރޭގައި މަޖިލީހަށް ފޮނުވުމަށް މަސައްކަތް ކުރަމުންދާ ކަމަށް ބަންޑާރަ ނައިބު އަހުމަދު އުޝާމް ވަނީ ވިދާޅުވެފައެވެ.
ޝާމް ވިދާޅުވެފައިވަނީ މިއީ ޅަދަރިންނާއި ޒުވާނުންގެ އިތުރުން މުޅި ޤައުމުގެ ރައްޔިތުންގެ ހައްޤުގައި ނިންމަވާފައިވާ ނިންމެވުމެއް ކަމަށެވެ.
