ނ. ވެލިދޫ އާއި ހއ. ދިއްދޫ ގައި ޤާއިމްކުރަމުންދާ ޖޫނިއަރ ކޮލެޖްތަކުގައި 2025 ވަނަ އަހަރު ކިޔަވައިދޭން ފެށޭނެކަމަށް މަތީ ތައުލީމާއި މަސައްކަތްތެރިކަމާއި ހުނަރުތައް ތަރައްޤީކުރުމާއި ބެހޭ ވުޒާރާއިން ހާމަކޮށްފިއެވެ.
ރައީސް ޞާލިޙްގެ ސަރުކާރުން ފަށާފައިވާ މި މަޝްރޫޢުގެ އަދާހަމަ މަޢުލޫމާތު ހާމަކުރަމުން، ވުޒާރާއިން ބުނެފައިވަނީ ވެލިދޫ ޖޫނިއަރ ކޮލެޖްގެ 30 އިންސައްތަ އަދި ދިއްދޫ ޖޫނިއަރ ކޮލެޖްގެ 90 އިންސައްތަ މަސައްކަތް ނިމިފައިވާ ކަމަށެވެ. މި މަސައްކަތްތައް ސަރުކާރުން ޙަވާލުކޮށްފައިވަނީ އެމްޓީސީސީ އާއެވެ.
ވެލިދޫގައި ތަރައްޤީކުރާ އިންސްޓިޓިއުޓަކީ ދިވެހި ޒުވާނުންނަށް މަސައްކަތާއި ހުނަރުގެ ތަޢުލީމާއި ތަމްރީނުގެ ފުރުޞަތުތައް ފަހިކޮށްދިނުމަށް އަމާޒުކޮށްގެން ޤާއިމްކުރެވޭ ތަނެކެވެ.
މި އިމާރާތުގައި 2 ކްލާސް ރޫމާއި، އައިސީޓީ ލެބަކާއި، ލައިބްރަރީ އެއްގެ އިތުރުން 2 ވޯކްޝޮޕް ހިމެނެއެވެ. އަނެއްކޮޅުން، ހއ. ދިއްދޫ ޖޫނިއަރ ކޮލެޖް ވަނީ ފުޑް ޕްރޮސެސިންގ ދާއިރާގެ އެކި ލެވެލްތަކުގެ ކޯސްތަށް ހިންގުމަށް ޚާއްސަ ކޮށްފައެވެ. މީގެ އިތުރުން، ވޮކޭޝަނަލް ދާއިރާއާއި ގުޅުންހުރި އެހެނިހެން ކޯސްތައް ވެސް މި އިންސްޓިޓިއުޓުގައި ކުރިއަށް ގެންދިއުމަށް ވަނީ ރޭވިފައެވެ. މި މަސައްކަތްތަކުގެ މައިގަނޑު އަމާޒަކީ 2025 ވަނަ އަހަރު މި ދެ ކޮލެޖްގައިވެސް ކިޔަވައިދޭން ފެށުމެވެ.
