މިއަހަރުގެ މަސްވެރިންގެ ދުވަސް މާލޭގައި ފާހަގަކުރުމަށް ނިންމާ، މަސްވެރިންނަށް ޚާއްޞަކޮށްގެން ދެވޭ އެވޯޑުތަކަށް ކުރިމަތިލުމުގެ ފުރުޞަތު ހުޅުވާލައިފިއެވެ. މަސްވެރިކަމާއި ކަނޑުގެ ވަޞީލަތްތަކާބެހޭ ވުޒާރާއިން މަޢުލޫމާތު ދެއްވާފައިވާ ގޮތުގައި، މިއީ 44 ވަނަ މަސްވެރިންގެ ދުވަހުގެ ރަސްމީ އިޙްތިފާލެވެ. އަދި އަންނަ އަހަރު މި ދުވަސް އަތޮޅުތެރޭގެ ރަށެއްގައި ފާހަގަކުރުމުގެ ފުރުަތު އޮތްކަމަށްވެސް އެ ވުޒާރާއިން ވިދާޅުވެފައިވެއެވެ.
މި މުނާސަބަތުގައި މަސްވެރިންނަށް ޚާއްޞަކޮށްގެން ދެވޭ އެވޯޑުތަކަށް ކުރިމަތިލުމުގެ ފުރުޞަތު މިހާރު ވަނީ ހުޅުވާލާފައެވެ. މި އެވޯޑުތައް އަމާޒުކުރެވިފައިވަނީ މިހާރުވެސް މަސްވެރިކަމުގައި ޢަމަލީގޮތުން ހަރަކާތްތެރިވާ، އަދި މަސްވެރިކަން ފިޔަވައި އެހެން މަސައްކަތަކުން އާމްދަނީ ނުހޯދާ މަސްވެރިންނަށެވެ. މީގެ ތެރޭގައި ހިމެނެނީ 35 އަހަރުން ދަށުގެ އެންމެ ޚިދުމަތްތެރި ޒުވާން ކެޔޮޅާއި، 35 އަހަރުން މަތީގެ އެންމެ ތަޖުރިބާކާރު ކެޔޮޅު، އަދި ފަރުމަސްވެރިކަން މައިގަނޑު މަސައްކަތެއްގެ ގޮތުގައި ކުރާ އެންމެ ޚިދުމަތްތެރި ފަރުމަސްވެރިޔާގެ އެވޯޑެވެ.
މި އެވޯޑުތަކަށް ކުރިމަތިލުމަށް ބޭނުންވާ ފަރާތްތަކަށް، މަސްވެރިކަމާބެހޭ ވުޒާރާގެ ވެބްސައިޓުން ފޯމު ޑައުންލޯޑުކުރެވެން ހުންނާނެއެވެ. ފޯމު ހުށަހެޅުމުގެ ސުންގަޑިއަކީ އަންނަ މަހުގެ 7 ވަނަ ދުވަހުގެ މެންދުރުފަހު 2:00 އެވެ. ފޯމުތައް ހުށަހަޅަންވާނީ މަސްވެރިކަމާބެހޭ ވުޒާރާގެ އީމެއިލް އެޑްރެހަށެވެ. އަދި މި އެވޯޑުތަކަށް އަމިއްލަ ހައިސިއްޔަތުން ނުވަތަ އެހެން ފަރާތެއްގެ ނަމުގައިވެސް ކުރިމަތިލެވޭނެއެވެ.
ރާއްޖޭގައި މަސްވެރިންގެ ދުވަސް ފާހަގަކުރަނީ ކޮންމެ އަހަރެއްގެވެސް ޑިސެންބަރު މަހުގެ 10 ވަނަ ދުވަހުއެވެ. ފާއިތުވި އަހަރުވެސް މި ދުވަސް ފާހަގަކޮށްފައިވަނީ މާލޭގައެވެ.
