ރާއްޖޭގެ ފުރަތަމަ ޑިވެލޮޕްމެންޓް ޕީޑިއެޓްރިޝަން ޑރ. އައިމިނަތު ފަޒްނާ އައިޖީއެމްއެޗުގައި ފަރުވާ ދޭން ފައްޓަވައިފިއެވެ.
އައިޖީއެމްއެޗުން އެކްސްގައި ކުރި ޕޯސްޓެއްގައި ބުނީ ޑރ. ފަޒުނާ ކިޔަވާ ވިދާޅުވުމަށް ފަހު އެނބުރި ވަޑައިގެން އެ ހޮސްޕިޓަލުގައި ބަލި މީހުން ބައްލަވަން ފައްޓަވާފައިވާ ކަމަށެވެ. ފަޒުނާ ހާއްސަވަނީ ކުޑަކުދިންގެ ކިބައިގައި ހުންނަ އޯޓިޒަމްއާއި އޭޑީއެޗްޑީ އަދި ދަސްކުރުމުގެ ނުކުޅެދުންތެރިކަން ފަދަ ބަލިތަކަށް ކަމަށް އައިޖީއެމްއެޗުން ބުނެފައިވެއެވެ.
އެ ފަދަ ބަލިތައް ދެނެގަތުމަށް ހަދާ، 'ބޭލޭ-4′ އާއި 'އޭޑީއޯއެސް-2′ ފަދަ އެންމެ ފެންވަރު ރަނގަޅު މިންގަނޑުތައް ބޭނުންކޮށްގެން، ފުރިހަމަ އެސެސްމެންޓުތައް ހެދުމުގެ ހުނަރު ފަޒްނާއަށް ލިބިވަޑައިގެންފައިވާ ކަމަށް އައިޖީއެމްއެޗުން ބުނެފައިވެއެވެ.
ފަޒްނާ ތަމްރީން ހާސިލް ކުރެއްވީ މެލޭޝިއާގެ ނެޝަނަލް ޔުނިވަސިޓީ އާއި އެމެރިކާގެ ޔުނިވަސިޓީ އޮފް ކެލިފޯނިއާ އިންނެވެ. އެ ޔުނިވަސިޓީތަކުގައި ފަޒްނާ ވަނީ ތިން އަހަރު ހޭދަކުރައްވައިފައެވެ.
