އިންޑިއާގެ އެކި ކުންފުނިތަކުން އުފައްދާފައިވާ 16 ބޭހަކުން ގިނަ ކޮލިޓީގެ މައްސަލަތައް ފާހަގަކުރެވިފައިވާތީ އެކަމަށް ސަމާލުވުމަށް މޯލްޑިވްސް ފުޑް އެންޑް ޑްރަގް އޮތޯރިޓީ (އެމްއެފްޑީއޭ) އިން އެދިއްޖެއެވެ.
އެމްއެފްޑީއޭ އިން ބުނީ އިންޑިއާގެ އެކު ކުންފުނިތަކުން އުފައްދާ 16 ޕްރޮޑަކްޓަކުން ގިނަ ކޮލިޓީ މައްސަލަތައް ފާހަގަވެފައިވާ ކަމަށް އިންޑިއާގެ ބޭސް ރެގިއުލޭޓްކުރާ މައި އިދާރާ (ސީޑީއެސްސީއޯ) އިން އެލާޓް ނެރެފައިވާ ކަމަށެވެ. އެ އެލާޓާ ގުޅިގެން ރާއްޖޭގެ މާކެޓުގައި އަދި އެޕްރޫވްޑް ޑްރަގް ލިސްޓުގައި އެ ބޭސްތައް ހިމެނޭތޯ ބެލުމަށް އެ އޮތޯރިޓީގެ ފަރާތުން ގިނަގުނަ މަސައްކަތްތަކެއް ކޮށް މާކެޓް އިވެލުއޭޝަން ހެދި ކަމަށް އެމްއެފްޑީއޭ އިން ބުންޏެވެ.
އެގޮތުން ލިސްޓުގައި ހިމެނޭ އެއްވެސް ބޭހެއްގެ އެއްވެސް ބެޗެއް ބޭސް އިމްޕޯޓްކުރުމަށް ކަނޑައަޅާފައިވާ އެއްވެސް އުސޫލެއްގެ ދަށުން ރާއްޖެއަށް އިމްޕޯޓްކޮށްފައި ނުވާ ކަމަށް އެމްއެފްޑީއޭ އިން ބުންޏެވެ.
ނަމަވެސް އިންޑިއާއަކީ ގިނަ އަދަދެއްގެ ދިވެހިން ބޭސް ފަރުވާއަށް ގޮސް އުޅޭ ގައުމަކަށްވެފައި، ބައެއް ހާލަތްތަކުގައި އަމިއްލަ ބޭނުމަށް އިންޑިއާއިން ބޭސް އެތެރެ ކުރާތީ އެކަމަށް ސަމާލުވުމަށް އެމްއެފްޑީއޭ އިން ވަނީ އެދިފައެވެ.
ސަމާލުވުމަށް އަންގާފައިވާ ބައެއް ބޭސްތަކަކީ:
- ފަލްމޮސިލް
- ޕެންޓޯސިޑް
- އުރިސޮކޮލް 300
- ތެލްމާ އެޗް
- ޑިފްލެޒާކޯޓް ޓެބްލެޓް
- ޕަޒިވިއާ
ރައްކާތެރި ކަމުގެ ފިޔަވަޅެއްގެ ގޮތުން ރާއްޖެއަށް ބޭސް އިމްޕޯޓްކުރާ ޕޯޓުތަކުގެ އިންސްޕެކްޝަންތައް އިތުރަށް ވަރުގަދަކޮށް އެފަދަ ބޭސްތައް އެތެރެވިޔަ ނުދިނުމަށްޓަކައި ކުރަންޖެހޭ އެންމެހާ މަސައްކަތްތައް ކުރަމުންގެންދާނެ ކަމުގެ ފުރިހަމަ ޔަގީންކަން އެމްއެފްޑީއޭ އިން ވަނީ ދީފައެވެ.
އަދި އެކަމާ ގުޅޭ އިތުރު މައުލޫމާތު ބޭނުންވާނަމަ އެ އޮތޯރިޓީގެ ހޮޓްލައިން 7200321 އަށް ގުޅުމަށް އެދިފައިވެއެވެ.
