މިއަހަރު އޭލެވެލް ކިޔަވަން ފެށި ދަރިވަރުންގެ އަދަދު ކުރީ އަހަރުތަކާ އަޅާބަލާއިރު 70 ޕަސެންޓު އިތުރުވެފައިވާކަމަށް އެޑިޔުކޭޝަން މިނިސްޓަރު ޑރ. އިސްމާއިލް ޝަފީއު މިއަދު ހާމަކުރައްވައިފިއެވެ. މީގެ ކުރިން ތައުލީމީ ދާއިރާގެ ބޭފުޅުން ވަނީ އޭލެވެލަށް ކިޔަވާ ކުދިންގެ އަދަދު މަދުކަމުގެ ކަންބޮޑުވުން ފާޅުކުރައްވަމުން ގެންދަވާފައެވެ.
މާލޭގެ ސީއެޗްއެސްއީގައި ބޭއްވުނު "ހަތްވަނަ އިންޓަނޭޝަނަލް ޓީޗާސް ކޮންފަރެންސް" ގެ ފެށުމުގެ ރަސްމިއްޔާތުގައި ވާހަކަފުޅު ދައްކަވަމުން މިނިސްޓަރު ވިދާޅުވީ، ތައުލީމީ ދާއިރާ ހަރުދަނާކޮށް، މަތީ ތައުލީމާ ގުޅޭ ކުދިންގެ ނިސްބަތް އިތުރުކުރުމަށް ސަރުކާރުން ގިނަ މަސައްކަތްތަކެއް ކުރަމުން އަންނަ ކަމަށެވެ. ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން އެޑިއުކޭޝަން މިނިސްޓްރީން ކުރި މަސައްކަތުގެ ނަތީޖާ ވަރަށް ރަނގަޅު ކަމަށް މިނިސްޓަރު ފާހަގަކުރެއްވިއެވެ.
މިނިސްޓަރު އިތުރަށް ވިދާޅުވީ މި މަސައްކަތުގެ ނަތީޖާއަކަށް ވާނީ ޔުނިވާސިޓީގެ ކިޔެވުމާ ގުޅޭ ކުދިންގެ އަދަދު އިތުރުވެ، ތައުލީމީ ނިޒާމު ހަރުދަނާވެ، ގައުމީ އުފެއްދުންތެރިކަމަށް ބޭނުންވާ ޒުވާނުންގެ އައު ޖީލެއް ޔުނިވާސިޓީތަކުގެ ތެރެއިން ނުކުމެގެން އައުން ކަމަށެވެ. ސަރުކާރުގެ ސްކޫލުތަކުގައި 2023 ވަނަ އަހަރާ އަޅާބަލާއިރު 2024 ވަނަ އަހަރު ގްރޭޑް 11 އަށް ވަން ދަރިވަރުންގެ އަދަދު 70 އިންސައްތައަށް އިތުރުވެފައިވާ ކަމަށް އިސްމާއިލް ވިދާޅުވިއެވެ.
އޭލެވެލް ކިޔަވާ ދަރިވަރުންގެ އަދަދު އިތުރު ކުރުމަށް ސަރުކާރުން ވަނީ ގިނަ ފިޔަވަޅުތަކެއް އަޅާފައެވެ. މީގެ ތެރޭގައި މާލޭގައި ޒަމާންވަންދެން ހިންގި އޭ ލެވެލް ސްކޫލް، ސީއެޗްއެސްއީ އިމާރާތް އަލުން ހުޅުވައި ކިޔަވައިދޭން ފެށުމާއި، އިތުރު 23 ސްކޫލެއްގައި އޭ ލެވެލް ފެށުމަށް ނިންމުމާއި، އެއް މާއްދާއިން ފާސްވިޔަސް ކިޔަވަން ފުރުސަތު ދިނުމަށް ރައީސް ނިންމެވުން ހިމެނެއެވެ.
