ދިވެހިރާއްޖެއާއި ސަޢޫދީ ޢަރަބިއްޔާ ދެމެދު ވިޔަފާރީގެ ފުރުސަތުތައް ފުޅާކުރުމަށް އަމާޒުކޮށް މުހިންމު އެއްބަސްވުމެއްގައި ސޮއިކުރެވިއްޖެއެވެ.
މި އެއްބަސްވުން ވުޖޫދަށް އައީ ދިވެހިރާއްޖޭގެ އިކޮނޮމިކް މިނިސްޓަރު މުޙައްމަދު ސަޢީދު ސަޢޫދީ ޢަރަބިއްޔާއަށް ކުރައްވަމުންދާ ރަސްމީ ދަތުރުފުޅެއްގެ ތެރެއިންނެވެ. މި އެއްބަސްވުމުގައި ދިވެހިރާއްޖޭގެ ފަރާތުން ސޮއިކުރެއްވީ މިނިސްޓަރު ސަޢީދު ކަމަށްވާއިރު، ސަޢޫދީ ޢަރަބިއްޔާގެ ފަރާތުން ސޮއިކުރެއްވީ އެ ޤައުމުގެ ކޮމާސް މިނިސްޓަރު މަޖީދު ބިން ޢަބްދުﷲ ބިން ޢުޘްމާން އަލްޤަސާބީއެވެ.
Had constructive discussions with H.E. Eng. Ibrahim Almubarak @MISA during my official visit to Saudi Arabia. Both nations are eager to explore new avenues of partnership and investments & build on our long term relationship to create opportunities for mutual growth. pic.twitter.com/GvMEPLXfFL
— Mohamed Saeed (@em_saeed) September 30, 2024
އެއްބަސްވުމުގައި ސޮއިކުރެވުމާ ގުޅިގެން، ސަޢޫދީ ކޮމާސް މިނިސްޓަރު އަލްޤަސާބީ ވަނީ އިޖުތިމާޢީ މީޑިއާގައި ޕޯސްޓެއް ކުރައްވާފައެވެ. މި ޕޯސްޓުގައި އޭނާ ހާމަކުރެއްވި ގޮތުގައި، ދިވެހިރާއްޖޭގެ އިކޮނޮމިކް މިނިސްޓަރާއެކު ބޭއްވުނު ބައްދަލުވުމުގައި ދެ ޤައުމުގެ ދެމެދުގައި އޮތް އިޤްތިޞާދީ ގުޅުން އިތުރަށް ހަރުދަނާކުރުމާ ބެހޭގޮތުން މަޝްވަރާކުރެވުނެވެ. އަދި މީގެ އިތުރުން، ދެ ޤައުމުގެ މެދުގައި އެއްބާރުލުން އިތުރުކޮށް، ވިޔަފާރީގެ ފުރުސަތުތައް ބަދަލުކުރުމުގެ އެއްބަސްވުމެއްގައިވެސް ސޮއިކުރެވުނެވެ.
މިނިސްޓަރު ސަޢީދުގެ މި ދަތުރުފުޅުގައި، ސަޢޫދީ ޢަރަބިއްޔާގެ އިންވެސްޓްމަންޓް މިނިސްޓްރީގެ އެސިސްޓެންޓް މިނިސްޓަރު އިބްރާހީމް އަލްމުބާރަކްއާވެސް ބައްދަލުކުރެއްވިއެވެ. މި ބައްދަލުވުމުގައިވެސް ދެ ޤައުމުގެ ގުޅުން އިތުރަށް ބަދަހިކުރުމާ ބެހޭގޮތުން މަޝްވަރާކުރެވުނު ކަމަށް މިނިސްޓަރު ސަޢީދު ވިދާޅުވެފައިވެއެވެ.
ކޮމެންޓު ފޮނުވާ