އުސްފަސްގަނޑާ ދިމާލުން މަރުވެފައި އޮއްވައި ފެނުނީ އެމްޑީޕީގެ އެކްޓިވިސްޓެއްގެ ގޮތުގައި ކުރިން ހަރަކާތްތެރިވި އިބްރާހިމް ޖައުހަރީ (ޖޯރޭ) ކަން އެނގިއްޖެއެވެ.
ކުރީގެ ރައީސް މައުމޫން އަބްދުލްގައްޔޫމްގެ ވެރިކަމުގެ ދުވަސްވަރު ރާއްޖޭގައި މިހާރު މި އޮތް މަލްޓި ޕާޓީ، ވެރިކަމުގެ ނިޒާމު ގެނައުމަށް ކުރި މުޒާހަރާތަކުގެ ފޮޓޯ ނެގުމުގައި ވަަރަށް ހަރަކާތްތެރިކޮށް އުޅުނު މީހެކެވެ. އޭނާއަކީ ފޮޓޯގްރާފަރެއްގެ އިތުރުން ނޫސްވެރިއެއްގެ ގޮތުގައި ވެސް މަސައްކަތް ކުރާ މީހެކެވެ. ޖައުހަރީއަކީ މި ފަހުން ވެސް އެމްޑީޕީގެ ހަރަކާތްތަކުގައި ބައިވެރިވެ ފޮޓޯ ނަގަމުން އައި މީހެކެވެ.
ފުލުހުން ބުނީ، އުސްފަސްގަނޑާ ދިމާލު ބޭރު ކަނޑުމަތީގައި މީހަކު މަރުވެފައި އޮތް ކަމުގެ ރިޕޯޓު ހަވީރު ލިބުމާ ގުޅިގެން އޭނާ އައިޖީއެމްއެޗަށް ގެންދިޔަ ކަމަށާއި ގެންދިޔައިރު ވެސް ނިޔާވެފައިވާ ކަމަށެވެ.
ޖައުހަރީ އެންމެ ފަހުން މިއަދު ފެނުނީ އުސްފަސްގަނޑާ ދިމާލުން ގާތައް މަތީގައި މަސްބާނަން ހުއްޓައެވެ. އޭނާއަކީ އާންމުކޮށް އެ ސަރަހައްދަށް މަސް ބާނަން ދާ މީހެކެވެ.
މިނިވަން ނިއުސްގެ ރިޕޯޓަރެއްގެ ހައިސިއްޔަތުން އެކިއެކި ޝަރީއަތްތައް ކަވަރު ކުރަން ވެސް ޖައުހަރު ކޯޓުތަކަށް ދިޔައެވެ. ޖައުހަރީއަކީ ދޮންނަ މެޝިނާއި މޯޓަރު ފަދަ ތަކެތި މަރާމާތު ކޮށްދިނުމުގައި ވެސް މާލޭގައި ނަން މަޝްހޫރު މީހެކެވެ. އޭނާއަކީ ރާއްޖޭގެ މަޝްހޫރު ގާނޫނީ ވަކީލެއް ކަމަށްވާ މަރިޔަމް ޝުނާނާގެ ވެސް ބައްޕައެވެ.
