އެމްއެންޑީއެފްއާ ގުޅިގެން ސްޓެލްކޯގެ ލީޑާޝިޕް އެންހޭންސްމަންޓް ޕްރޮގްރާމްގެ ހަތް ވަނަ ބެޗްގެ ޓްރެއިނިން އިއްޔެ ގިރިފުށީ ޓްރެއިނިން ސެންޓަރުގައި ފަށައިފިއެވެ.
ސްޓެލްކޯގެ މެނޭޖިން ޑިރެކްޓަރު ހުސެއިން ފަހުމީ އެކްސްގައި ކުރެއްވި ޕޯސްޓެއްގައި ވިދާޅުވީ، އެ ޕްރޮގްރާމަކީ ސްޓެލްކޯގެ ޓީމް ބާރުވެރިކުރުމަށް ކުރެވޭ ދެމެހެއްޓެނިވި މަސައްކަތުގެ މުހިންމު ބައެއް ކަމަށާއި އެ ބެޗްގައި ކުންފުނީގެ 51 މުވައްޒަފުން ބައިވެރިވެ، އެމީހުންގެ ލީޑާޝިޕް ހުނަރުތައް ތަރައްގީކުރުމަށް މަސައްކަތްކުރެވޭނެ ކަމަށެވެ.
"މިހާތަނަށް 368 އަށްވުރެ ގިނަ މުވައްޒަފުންނަށް އެ ތަމްރީނު ދީފައިވާއިރު، ކުރިއަށް އޮތް 12 މަސްދުވަހުގެ ތެރޭގައި ހުރިހާ މުވައްޒަފުންނަށް މި ފުރުސަތު ފޯރުކޮށްދިނުމަކީ އަމާޒު. ކުންފުނީގެ ލަނޑުދަނޑިތައް ހާސިލުކުރުމަށާއި ކުރިއަށް ގެންދިއުމަށް ހުރިހާ ފެންވަރެއްގައި ވެސް ވަރުގަދަ ލީޑަރޝިޕް މުހިންމު." ފަހުމީ ވިދާޅުވިއެވެ.
އެ ޕްރޮގްރާމް ކާމިޔާބުކުރުމަށް ސުޕްރީމް ކޮމާންޑަރު ޑރ. މުހައްމަދު މުއިއްޒު، ދިފާއީ ވަޒީރު މުހައްމަދު ޣައްސާން މައުމޫން، ޗީފް އޮފް ޑިފެންސް ފޯސް އަދި މޯލްޑިވްސް ނޭޝަނަލް ޑިފެންސް ފޯސްގެ ލީޑާޝިޕްގެ ފަރާތުން ދެއްވާ އެހީތެރިކަމާއި އެއްބާރުލެއްވުން ވަރަށް މުހިންމު ދައުރެއް އަދާކުރާ ކަމަށް ފަހުމީ ވިދާޅުވިއެވެ.
ފަހުމީ ވިދާޅުވީ، މުވައްޒަފުންގެ ކުރިއެރުމަށް އިންވެސްޓްކުރުމަކީ ސްޓެލްކޯގެ މުސްތަގްބަލަށާއި ހިދުމަތްދޭ މުޖުތަމައުގެ ފުޅާ ދާއިރާއަށް ކުރެވޭ އިންވެސްޓްމަންޓެއް ކަމަށެވެ. އަދި އެ ތަމްރީން ޕްރޮގްރާމްގެ ސަބަބުން ސްޓެލްކޯގެ އިތުރަށް މުޅި މުޖްތަމައަށް ވެސް ފައިދާވާނެ ކަމަށް ވިދާޅުވިއެވެ.
